【外游生活】第2个家 @ 台湾

几年前, 一个人去左台湾展开半年既读书生活, 就系呢半年, 台湾已经成为左我第二个家, 依家无时无刻都想番乡下。第一次一个人独立生活, 系机场入闸时流左几滴眼泪, 到埗之后就要收拾心情啦! 个晚到左大学之后, 忙住买必需品, 整理好自己间房之后, 第一晚系完全失眠, 因为我系最早到既roommate, 一个人系一间又黑又潮湿既房真系好不安。
但之后慢慢习惯左, 对呢个地方爱不释手, 系台湾呢个宝岛, 我尝试左好多好多以前未试过既野, 亦变左我人生中一份好宝贵既回忆, 而当中有几个经历系十分难忘! 

其实我系台湾读左一个SEM ( 4个月), 之后我再留多2个月, 就系希望可以俾多少少时间自己去体验台湾。当中觉得最难忘系跟当地既学生团去踩单车环台北岛, 一共5日,每日大概踩 105公里, 而我当时报名系以为观光形式既单车团, 点知去到先知"大件事" ! 佢地每个人都好似专业车手咁, 系要赶进度, 当然我系最慢个个, 永远都第尾, 心里面好想好想放弃, 因为台湾既路真系唔易踩, 上上落落, 又大雨, 但另一边又不断鼓励自己冲埋去, 第一日希望快啲第五日, 晚晚训教只脚都就断咁, 依家谂起都惊, 哈哈! 第五日, 冲线个刻松左口气, 亦好感激有一班台湾同伴呢几日陪住我, 如果唔系真系唔知点挨。

除左吓死我既单车团之外, 仲同其他台湾朋友去左外岛-兰屿 。实在太太太好玩, 呢个地方飞鱼最出名, 我当时唔信有鱼系识飞, 直至我亲眼见到。呢个行程好正(当土朋友帮手安排), 天空布满星星, 香港好难会见到咁密集既星星, 一齐去浮潜, 玩水, 爬山, 睇星倾心事, 觉得眼前一切都好唔真实, 好想时间停留系呢一刻。

 

台湾地大, 可以玩既野真系可以好多好多。读完个一个SEM之后, 拖住个大喼去台中展开一连十日既打工换宿。上网揾民宿申请既时候, 老板问我识整咩拿手小菜, 是但讲左一样野, 点知之后打工既时侯, 老板真系叫我煮啰, 哈哈! 每日帮手收拾下被单, 大概4小时, 之后就系自由时间,  因为老板都希望小帮手可以有多啲时间去感受下当地。到依家我都会推荐呢间民宿俾朋友, 因为老板好有人情味, 客人都好好, 环境都舒服~走既时间真系好唔舍得老板, 但因为要赶去下一个地方啦。

而下一个地方就系基隆啦~ 出名既渔港, 近海所以比较潮湿, 而且成日落雨。又系一间人情味满满既民宿, 一去到讲左句: 好想钓鱼啊~  佢地即刻帮我安排, 不过系由夜晚出海钓到第二日朝早。一开始完全掌握唔到个技巧, 一条都钓唔到, 有少少灰心。请教左钓鱼神手, 即刻钓左好多条, 钓到凌晨4点, 太阳慢慢向上升, 系海中心睇住太阳升起内心系好激动,  靓到唔识形容, 觉得人生一定要去基隆钓一次鱼!!

其实除左上面既经历之外, 仲去过好多台湾既其他地方玩过, 例如潜水, 滑翔伞, 睇热气球等等, 希望有机会可以再分享多啲:) !