【外遊生活】第2個家 @ 台灣

幾年前, 一個人去左台灣展開半年既讀書生活, 就係呢半年, 台灣已經成為左我第二個家, 依家無時無刻都想番鄉下。第一次一個人獨立生活, 係機場入閘時流左幾滴眼淚, 到埗之後就要收拾心情啦! 個晚到左大學之後, 忙住買必需品, 整理好自己間房之後, 第一晚係完全失眠, 因為我係最早到既roommate, 一個人係一間又黑又潮溼既房真係好不安。
但之後慢慢習慣左, 對呢個地方愛不釋手, 係台灣呢個寶島, 我嘗試左好多好多以前未試過既野, 亦變左我人生中一份好寶貴既回憶, 而當中有幾個經歷係十分難忘! 

其實我係台灣讀左一個SEM ( 4個月), 之後我再留多2個月, 就係希望可以俾多少少時間自己去體驗台灣。當中覺得最難忘係跟當地既學生團去踩單車環台北島, 一共5日,每日大概踩 105公里, 而我當時報名係以為觀光形式既單車團, 點知去到先知"大件事" ! 佢地每個人都好似專業車手咁, 係要趕進度, 當然我係最慢個個, 永遠都第尾, 心裡面好想好想放棄, 因為台灣既路真係唔易踩, 上上落落, 又大雨, 但另一邊又不斷鼓勵自己衝埋去, 第一日希望快啲第五日, 晚晚訓教隻腳都就斷咁, 依家諗起都驚, 哈哈! 第五日, 衝線個刻鬆左口氣, 亦好感激有一班台灣同伴呢幾日陪住我, 如果唔係真係唔知點捱。

除左嚇死我既單車團之外, 仲同其他台灣朋友去左外島-蘭嶼 。實在太太太好玩, 呢個地方飛魚最出名, 我當時唔信有魚係識飛, 直至我親眼見到。呢個行程好正(當土朋友幫手安排), 天空佈滿星星, 香港好難會見到咁密集既星星, 一齊去浮潛, 玩水, 爬山, 睇星傾心事, 覺得眼前一切都好唔真實, 好想時間停留係呢一刻。

台灣地大, 可以玩既野真係可以好多好多。讀完個一個SEM之後, 拖住個大喼去台中展開一連十日既打工換宿。上網搵民宿申請既時候, 老闆問我識整咩拿手小菜, 是但講左一樣野, 點知之後打工既時侯, 老闆真係叫我煮囉, 哈哈! 每日幫手收拾下被單, 大概4小時, 之後就係自由時間,  因為老闆都希望小幫手可以有多啲時間去感受下當地。到依家我都會推薦呢間民宿俾朋友, 因為老闆好有人情味, 客人都好好, 環境都舒服~走既時間真係好唔捨得老闆, 但因為要趕去下一個地方啦。

而下一個地方就係基隆啦~ 出名既漁港, 近海所以比較潮濕, 而且成日落雨。又係一間人情味滿滿既民宿, 一去到講左句: 好想釣魚啊~  佢地即刻幫我安排, 不過係由夜晚出海釣到第二日朝早。一開始完全掌握唔到個技巧, 一條都釣唔到, 有少少灰心。請教左釣魚神手, 即刻釣左好多條, 釣到淩晨4點, 太陽慢慢向上升, 係海中心睇住太陽升起內心係好激動,  靚到唔識形容, 覺得人生一定要去基隆釣一次魚!!

其實除左上面既經歷之外, 仲去過好多台灣既其他地方玩過, 例如潛水, 滑翔傘, 睇熱氣球等等, 希望有機會可以再分享多啲:) !