唔少大学生系课余既时间都想揾返份补习part time赚下外快，因为人工高工时短，而且时间、地点都相对自由。就著私补呢个话题，今次呢篇文「私补老师攻略」主要想讲下私补老师点样可以准备好第一堂，系个家长或暂学生心目中留返个好印象，增加家长揾你长补既机会。Tutor Circle 寻补 希望呢篇文可以帮助到所有第一次帮人补习既老师，或姐已经补左好多次既导师，可以轻松面对补习第一堂啦！

私补首堂前准备

1.同家长／学生事前沟通好

同家长或者学生沟通好晒，可以贴近双方既期望。（图片来源：香港电台）

呢一点好重要！好重要！好重要！而且好容易比人忽略！好多补习老师都以为攞左家长或或者学生电话之后，剩系虽然同佢夹好时间咁就算，其实仲有好多野你要了解清楚，有啲家长同学生冇同你讲清楚要啲咩，而你又唔主动问，咁样就有机会出现误会，大大影响佢地对你既观感，以下整理左一啲问题去了解家长或者学生既需要：

• 教材系要导师准备定系学生自备？
• 课堂节奏可以去得快啲定系要慢慢讲？
• 程度暂时系level几／全级排第几？
• 目标系想升到level几／级排名升到几多？
• 读边间中学？中中定系英中？
• 学生而家教到咩topics？
• 仲有几耐要考试？
• 想温返啲旧野打好个底定系去新野？
• 学生既性格系点？（呢个问家长会比较好，问返学生自己有啲奇怪⋯⋯）
• 每隔几耐会交一次学费？（因为每堂找数会比较麻烦，通常都会系每4堂、每星期咁样找数比较方便）
• 有冇后备时间可以约到？（以防有啲突发既deadline同活动要赶课请假）

问多啲既目的都系希望了解返学生既状况同期望，始终大家素未谋面，你又唔清楚学生既需要就好难针对性去提供返佢地想要既野，大家沟通得好，课堂自然会顺畅好多啦！

2.准备教材

如果学生冇话自备教材，你就要准备好教材㗎啦！

了解左学生既需要之后，就紧系要好好准备第一堂要用既野啦！如果学生系自备教材既话，咁你就可以上网重温返一啲相应课题既资料，去确保所有概念都有记忆既，唔怕到时比学生问到口哑哑啦！同时你都可以考虑准备少少extra既笔记，当学生既教材用晒既时候都有野系手做下，以备不时之需！

如果家长或学生要求你准备教材既话，咁你一定要利申返自己未必真系好准确对到学生既考试范围，虽然系同一课，但唔同学校针对唔同既野既难度都有唔同，唔同既学生都有唔同进度，除左事前你要了解学生既需要，准备教材你都切记要准备多啲好过少，甚至准备埋后一课前一课，咁样就会比到家长或者学生你可信、有备而定既一而。

3.准时到达

 

准时到达补习场所，可以令你既第一印象加分。

呢层唔洗讲啦！守时是美德，补习既第一堂紧系要提前／准时去到补习地方，咁样做可以留一个好既印象比家长同学生，话比佢地听你系一个有责任心既人，咁佢地就会！

另外，出门时间方面预松少少，尤其是去你唔熟悉既地方，即使有Google Map都可能要自己花啲时间去揾，如果早到左既话又可以感觉轻松啲，唔洗急急忙忙上到去，搞到紧张得滞咩都唔记得晒。就好似考DSE个阵你都会早少少到考场熟习下，适应下个环境啦系咪先！早左到，热下身、放松下个人，咁一开波成个人都醒啲，自信心返晒黎啦！

 

私补首堂

4.唔好讲太多同课堂无关既野

补习首堂少一点说些无用的说话，先教好书先啦。 （图片来源：苹果日报）

虽然话私补要同学生打好关系，可以倾多少少闲偈，但系唔建议系第一堂就咁样做，因为始终大家未建立到信任既时候，如果你经常偏离课堂既主题，有机会令学生或者家长觉得你钟意吹水多过教书，认为你教唔到啲咩。你当然可以用轻松少少既语言去带动成个气氛，但系就唔好过份讲到其他兴趣、时事、八卦野、加IG等等既野。

你要记住，首堂既目标系比对方睇到你既专业，证明你系有能力去教学，而且系有热诚，切忌hea教吹水！建立关系既野等你同学生建立左互相之后再慢慢了解多啲都未迟，最紧要人地试完你堂觉得你有料，教到野，继续揾你补咁先有用㗎嘛！学曾钰成话斋：「我建议你少一点说些无用的话。」做好自己本份先啦。

 

5.幽默既你切忌随便同学生开玩笑

小编自己就有一段经历想分享下，第一次去上堂个阵，见个学生好似几玩得又几过瘾，跟住就隐隐约约串下佢，好似系「你确认你而家既水平系DSE考生？」咁上下既程度，点知个学生就突然个样有少少真嬲，讲左句：「你唔好咁mean得唔得呀」，之后就西面，有啲灰心，又有啲嬲咁，成堂个气氛就变得尴尬左，搞到我都几唔好意思。

每个人都有自己既难言之隐，唔好系未熟悉对方既时候乱咁同人开玩笑。（图片来源：赌侠）

虽然个学生最尾都有揾返我长补，但系呢个故事教识我真系唔好随便同人开玩笑，因为每个人都有啲地方系特别脆弱而你又唔知，尤其是第一堂个阵，所以真系唔好乱咁去串人，即使你觉得个样野好minor，等你地真系做左friend先再讲都未迟，就好似《赌侠》入面既达叔所讲：「每个人都有啲地方系特别脆弱既，而呀叔啱啱就系正个头到」，一定要慎言。

 

6.切记要有礼貌

有礼貌系非常重要，尤其是当对方未接触过你既话，礼貌系可以令佢对留下一个好好既印象。一见面一定要打招呼，走个阵用好啲既语气去请对方比一啲feedback你，同埋约埋下一堂时间，同埋讲拜拜，唔好急急脚走左去，比人感受到你系好caring同有heart。

有礼貌虽然系基本，但唔少导师都好忽略左。

而且，有礼貌除左比人感觉你系一个有修养、易相处同友善既人之外，仲可以比对方感受到你既认真同埋对教学既热诚。试问如果你揾一个帮你手做野，个个人又粗鲁又冇礼貌，你都会觉得佢好似唔系好想做咁啦（更甚既系，你唔会想受佢气），所以一定要以礼待人！

 

7.准备适量既功课份量比学生做返

适量既功课，有助学生吸收得更好。

比功课学生做其实有好多好处，以下就简介左三点。

第一，学生有功课做可以令佢地将学过既野即刻实践返，如果你上堂教到野，佢地再做多次，就会巩固到记忆，自然就会将你教既野更有效入到脑。

第二，可以比到一个印象对方，你唔系教完就算，你教完仲会有野比佢地做，家长听到一定会好开心，因为佢地最钟意就系比多啲功课，感觉好似实在啲。

第三，可以更加了解学生既性格，调整教学方针，你可以从学生系交功课既态度睇到佢地既性格，知己知彼先可以百战百胜。有心同勤力既学生多数会按时完成功课比你check，咁你就可以放心去教同assign功课比佢地做；对于乜都冇做既学生，你就应该谂多啲方法令佢地主动完成返啲功课，帮佢地揾出要读书既原因，激励佢地，例如同佢地讲下点解要读书、点解要做功课、做功课既目的系咩，有需要甚至可以揾家长出马，请家长督促佢下堂前做晒功课，都有助加速返上堂既节奏。

 

私补首堂后提醒

8.问返学生既feedback

Feedback可以量度学生对你既感受，可以要求佢地讲得直接啲。

如果你第一堂准备得唔系咁好，上堂既时候有啲虾碌，课堂时间又控制得唔系咁好，第一印象当然会打左折扣，但系过去左既野已经返唔到转头，而家唯一可以做既就系下一堂表现得好啲。

你可以做既就系问返佢地意见先，等你知道可以做啲咩令到课堂质素上升（教得太快？教得太浅？功课太少？解得唔够清晰？），你下堂就可以因应住呢啲comment调整返你既策略。如果我系学生见到你咁有心去提高教学质素，我都会即刻对你改观啦！

 

9.同家长夹得唔系好称心，主动同中介联络

作为导师同学生之间既桥梁，Tutor Circle 寻补欢迎导师系遇到困难时打比我地呻。

最后一点，有时你可能已经尽左力，但系对方仍然对你多多批评，尽管你已经落力为学生好，但依然得不到分数，你就可以揾返相应既中介去讲返成件事，未必系你唔啱㗎嘛，顾客不一定是对的！

 

总结

以上就归纳左私补老师第一堂要注意既地方，私补要补得好从来都唔容易，仲要挽留到家长学生既心，希望呢篇文章帮助到你去准备课堂，如果有任何意见都欢迎系下面留低comment，我地一定会比返答复你地！

本文由Tutor Circle 寻补提供刊登。