唔少大學生係課餘既時間都想搵返份補習part time賺下外快，因為人工高工時短，而且時間、地點都相對自由。就著私補呢個話題，今次呢篇文「私補老師攻略」主要想講下私補老師點樣可以準備好第一堂，係個家長或暫學生心目中留返個好印象，增加家長搵你長補既機會。Tutor Circle 尋補 希望呢篇文可以幫助到所有第一次幫人補習既老師，或姐已經補左好多次既導師，可以輕鬆面對補習第一堂啦！

私補首堂前準備

1.同家長／學生事前溝通好

同家長或者學生溝通好晒，可以貼近雙方既期望。（圖片來源：香港電台）

呢一點好重要！好重要！好重要！而且好容易比人忽略！好多補習老師都以為攞左家長或或者學生電話之後，剩係雖然同佢夾好時間咁就算，其實仲有好多野你要了解清楚，有啲家長同學生冇同你講清楚要啲咩，而你又唔主動問，咁樣就有機會出現誤會，大大影響佢地對你既觀感，以下整理左一啲問題去了解家長或者學生既需要：

• 教材係要導師準備定係學生自備？
• 課堂節奏可以去得快啲定係要慢慢講？
• 程度暫時係level幾／全級排第幾？
• 目標係想升到level幾／級排名升到幾多？
• 讀邊間中學？中中定係英中？
• 學生而家教到咩topics？
• 仲有幾耐要考試？
• 想溫返啲舊野打好個底定係去新野？
• 學生既性格係點？（呢個問家長會比較好，問返學生自己有啲奇怪⋯⋯）
• 每隔幾耐會交一次學費？（因為每堂找數會比較麻煩，通常都會係每4堂、每星期咁樣找數比較方便）
• 有冇後備時間可以約到？（以防有啲突發既deadline同活動要趕課請假）

問多啲既目的都係希望了解返學生既狀況同期望，始終大家素未謀面，你又唔清楚學生既需要就好難針對性去提供返佢地想要既野，大家溝通得好，課堂自然會順暢好多啦！

2.準備教材

如果學生冇話自備教材，你就要準備好教材㗎啦！

了解左學生既需要之後，就緊係要好好準備第一堂要用既野啦！如果學生係自備教材既話，咁你就可以上網重溫返一啲相應課題既資料，去確保所有概念都有記憶既，唔怕到時比學生問到口啞啞啦！同時你都可以考慮準備少少extra既筆記，當學生既教材用晒既時候都有野係手做下，以備不時之需！

如果家長或學生要求你準備教材既話，咁你一定要利申返自己未必真係好準確對到學生既考試範圍，雖然係同一課，但唔同學校針對唔同既野既難度都有唔同，唔同既學生都有唔同進度，除左事前你要了解學生既需要，準備教材你都切記要準備多啲好過少，甚至準備埋後一課前一課，咁樣就會比到家長或者學生你可信、有備而定既一而。

3.準時到達

 

準時到達補習場所，可以令你既第一印象加分。

呢層唔洗講啦！守時是美德，補習既第一堂緊係要提前／準時去到補習地方，咁樣做可以留一個好既印象比家長同學生，話比佢地聽你係一個有責任心既人，咁佢地就會！

另外，出門時間方面預鬆少少，尤其是去你唔熟悉既地方，即使有Google Map都可能要自己花啲時間去搵，如果早到左既話又可以感覺輕鬆啲，唔洗急急忙忙上到去，搞到緊張得滯咩都唔記得晒。就好似考DSE個陣你都會早少少到考場熟習下，適應下個環境啦係咪先！早左到，熱下身、放鬆下個人，咁一開波成個人都醒啲，自信心返晒黎啦！

 

私補首堂

4.唔好講太多同課堂無關既野

補習首堂少一點說些無用的說話，先教好書先啦。 （圖片來源：蘋果日報）

雖然話私補要同學生打好關係，可以傾多少少閒偈，但係唔建議係第一堂就咁樣做，因為始終大家未建立到信任既時候，如果你經常偏離課堂既主題，有機會令學生或者家長覺得你鐘意吹水多過教書，認為你教唔到啲咩。你當然可以用輕鬆少少既語言去帶動成個氣氛，但係就唔好過份講到其他興趣、時事、八卦野、加IG等等既野。

你要記住，首堂既目標係比對方睇到你既專業，證明你係有能力去教學，而且係有熱誠，切忌hea教吹水！建立關係既野等你同學生建立左互相之後再慢慢了解多啲都未遲，最緊要人地試完你堂覺得你有料，教到野，繼續搵你補咁先有用㗎嘛！學曾鈺成話齋：「我建議你少一點說些無用的話。」做好自己本份先啦。

 

5.幽默既你切忌隨便同學生開玩笑

小編自己就有一段經歷想分享下，第一次去上堂個陣，見個學生好似幾玩得又幾過癮，跟住就隱隱約約串下佢，好似係「你確認你而家既水平係DSE考生？」咁上下既程度，點知個學生就突然個樣有少少真嬲，講左句：「你唔好咁mean得唔得呀」，之後就西面，有啲灰心，又有啲嬲咁，成堂個氣氛就變得尷尬左，搞到我都幾唔好意思。

每個人都有自己既難言之隱，唔好係未熟悉對方既時候亂咁同人開玩笑。（圖片來源：賭俠）

雖然個學生最尾都有搵返我長補，但係呢個故事教識我真係唔好隨便同人開玩笑，因為每個人都有啲地方係特別脆弱而你又唔知，尤其是第一堂個陣，所以真係唔好亂咁去串人，即使你覺得個樣野好minor，等你地真係做左friend先再講都未遲，就好似《賭俠》入面既達叔所講：「每個人都有啲地方係特別脆弱既，而呀叔啱啱就係正個頭到」，一定要慎言。

 

6.切記要有禮貌

有禮貌係非常重要，尤其是當對方未接觸過你既話，禮貌係可以令佢對留下一個好好既印象。一見面一定要打招呼，走個陣用好啲既語氣去請對方比一啲feedback你，同埋約埋下一堂時間，同埋講拜拜，唔好急急腳走左去，比人感受到你係好caring同有heart。

有禮貌雖然係基本，但唔少導師都好忽略左。

而且，有禮貌除左比人感覺你係一個有修養、易相處同友善既人之外，仲可以比對方感受到你既認真同埋對教學既熱誠。試問如果你搵一個幫你手做野，個個人又粗魯又冇禮貌，你都會覺得佢好似唔係好想做咁啦（更甚既係，你唔會想受佢氣），所以一定要以禮待人！

 

7.準備適量既功課份量比學生做返

適量既功課，有助學生吸收得更好。

比功課學生做其實有好多好處，以下就簡介左三點。

第一，學生有功課做可以令佢地將學過既野即刻實踐返，如果你上堂教到野，佢地再做多次，就會鞏固到記憶，自然就會將你教既野更有效入到腦。

第二，可以比到一個印象對方，你唔係教完就算，你教完仲會有野比佢地做，家長聽到一定會好開心，因為佢地最鐘意就係比多啲功課，感覺好似實在啲。

第三，可以更加了解學生既性格，調整教學方針，你可以從學生係交功課既態度睇到佢地既性格，知己知彼先可以百戰百勝。有心同勤力既學生多數會按時完成功課比你check，咁你就可以放心去教同assign功課比佢地做；對於乜都冇做既學生，你就應該諗多啲方法令佢地主動完成返啲功課，幫佢地搵出要讀書既原因，激勵佢地，例如同佢地講下點解要讀書、點解要做功課、做功課既目的係咩，有需要甚至可以搵家長出馬，請家長督促佢下堂前做晒功課，都有助加速返上堂既節奏。

 

私補首堂後提醒

8.問返學生既feedback

Feedback可以量度學生對你既感受，可以要求佢地講得直接啲。

如果你第一堂準備得唔係咁好，上堂既時候有啲蝦碌，課堂時間又控制得唔係咁好，第一印象當然會打左折扣，但係過去左既野已經返唔到轉頭，而家唯一可以做既就係下一堂表現得好啲。

你可以做既就係問返佢地意見先，等你知道可以做啲咩令到課堂質素上升（教得太快？教得太淺？功課太少？解得唔夠清晰？），你下堂就可以因應住呢啲comment調整返你既策略。如果我係學生見到你咁有心去提高教學質素，我都會即刻對你改觀啦！

 

9.同家長夾得唔係好稱心，主動同中介聯絡

作為導師同學生之間既橋樑，Tutor Circle 尋補歡迎導師係遇到困難時打比我地呻。

最後一點，有時你可能已經盡左力，但係對方仍然對你多多批評，儘管你已經落力為學生好，但依然得不到分數，你就可以搵返相應既中介去講返成件事，未必係你唔啱㗎嘛，顧客不一定是對的！

 

總結

以上就歸納左私補老師第一堂要注意既地方，私補要補得好從來都唔容易，仲要挽留到家長學生既心，希望呢篇文章幫助到你去準備課堂，如果有任何意見都歡迎係下面留低comment，我地一定會比返答覆你地！

本文由Tutor Circle 尋補提供刊登。