《罗家聪博士，或应称呼作「罗师傅」》

香港地，预言家分两种：一种靠玄学，一种靠经济学。前者叫七师傅，后者叫罗家聪博士。不过近排我开始怀疑，两位可能系同门师兄妹。

 七师傅去年喺社交平台开坛作法，唔使罗庚，唔使起盘，单凭一句「恒指必穿2万点」，今年4月7号恒指跌到19828点收市，网民纷纷跪拜「七仙显灵」。而罗博士呢？佢5月15号上《一名经人》节目，化身「罗师傅」，唔使数据、唔使模型、唔使图表，就断言：「联系制度发生紧问题，香港，名义上挂美金，实际上无flow，实则息口跟大陆。如果有flow，冇可能有咁大息口差距，套息机制出问题，套唔到！」仲话银行全部知情但无人敢讲。「罗师傅」一边声称「无人敢讲出嚟」，一边自己讲到口沫横飞。呢种「众人皆七我独醒」嘅风范，简直同七师傅话「天机不可泄露，但我要开Live讲」异曲同工。

节目中，「罗师傅」斩钉截铁：「话有外资入嚟炒港股买楼嘅人，你哋悭啲啦！」佢认为美金喺香港进出全靠贸易带动：四月因关税战贸易停摆，所以「无flow」；但五月中美关税暂停火后，积压旧单要找数，资金涌入，就扯跌HIBOR。「罗师傅」话：「啲老行专都唔出嚟讲，呢个观察系好容易估计得到！」

咦？咁即系「4月无flow，5月有flow，HIBOR就会low」？真系好易㖞？我就忍唔住问：今年首季香港商品出口升10.9%，进口升9.8%，按「罗师傅」理论，咁大嘅贸易量，大量找数，HIBOR应该「low到濑」先啱。但HIBOR有冇low？冇㖞！抑或flow系要弹出弹入，HIBOR先会low？香港作为国际金融中心，每日外汇交易量以千亿计，如果呢啲唔系「flow」，咁「flow」系乜呢？咁「无flow论」其实系「真无flow」？定系纯粹「抢fo」？抑或系小市民如我智商唔够高？

 至于「罗师傅」话「香港无人玩套戥」，小市民应点样理解？套息交易系全球金融市场嘅ABC，只要港美息差存在，点解会突然「无人玩」？有啲乜嘢动机削弱套利机制？投资者对港元美元资产回报嘅信心会唔会影响套利？若果「套利机制死亡」呢种核弹级事件，点解全港银行、外资行、金管局全部静过太空？节目中「罗师傅」对以上解释均为「零」。或许佢认为经济学分析都远超小市民能理解，唔适合小市民观看，所以对于香港套息机制索性一字记之曰「亡」。

如果经济学者嘅责任唔系用严谨数据支撑分析，而系用专业吓人、夸张言论吸睛，咁不如直接请七师傅做你拍档，至少人哋话美股「跌」，好歹都附送一个黄道吉日4月19啊！建议两人组队参加双人脱口秀，一个合指算恒指，一个闭眼断汇市，堪称本港财经玄学界嘅「卧龙凤雏」。

经济学家嘅价值，在于用专业知识厘清市场迷雾，而非制造更多噪音。当一个博士嘅分析，连基本数据都唔能够深入浅出解释清楚，让小市民明白，反而要靠阴谋论（银行知但唔敢讲）去自圆其说，咁同啲师傅话「我睇到鬼但你睇唔到」有咩分别？

观众唔介意多一个少一个玄学家论股市，但一个真正能开民智、敢言、有理有据嘅经济博士，喺香港传媒界，此时此刻，尤为重要。毕竟，我哋已经有足够多嘅「师傅」，缺嘅系能够点醒小市民嘅「博士」。