《羅家聰博士，或應稱呼作「羅師傅」》

香港地，預言家分兩種：一種靠玄學，一種靠經濟學。前者叫七師傅，後者叫羅家聰博士。不過近排我開始懷疑，兩位可能係同門師兄妹。

 七師傅去年喺社交平台開壇作法，唔使羅庚，唔使起盤，單憑一句「恆指必穿2萬點」，今年4月7號恆指跌到19828點收市，網民紛紛跪拜「七仙顯靈」。而羅博士呢？佢5月15號上《一名經人》節目，化身「羅師傅」，唔使數據、唔使模型、唔使圖表，就斷言：「聯繫制度發生緊問題，香港，名義上掛美金，實際上無flow，實則息口跟大陸。如果有flow，冇可能有咁大息口差距，套息機制出問題，套唔到！」仲話銀行全部知情但無人敢講。「羅師傅」一邊聲稱「無人敢講出嚟」，一邊自己講到口沫橫飛。呢種「眾人皆七我獨醒」嘅風範，簡直同七師傅話「天機不可洩露，但我要開Live講」異曲同工。

節目中，「羅師傅」斬釘截鐵：「話有外資入嚟炒港股買樓嘅人，你哋慳啲啦！」佢認為美金喺香港進出全靠貿易帶動：四月因關稅戰貿易停擺，所以「無flow」；但五月中美關稅暫停火後，積壓舊單要找數，資金湧入，就扯跌HIBOR。「羅師傅」話：「啲老行專都唔出嚟講，呢個觀察係好容易估計得到！」

咦？咁即係「4月無flow，5月有flow，HIBOR就會low」？真係好易喎？我就忍唔住問：今年首季香港商品出口升10.9%，進口升9.8%，按「羅師傅」理論，咁大嘅貿易量，大量找數，HIBOR應該「low到瀨」先啱。但HIBOR有冇low？冇喎！抑或flow係要彈出彈入，HIBOR先會low？香港作為國際金融中心，每日外匯交易量以千億計，如果呢啲唔係「flow」，咁「flow」係乜呢？咁「無flow論」其實係「真無flow」？定係純粹「搶fo」？抑或係小市民如我智商唔夠高？

 至於「羅師傅」話「香港無人玩套戥」，小市民應點樣理解？套息交易係全球金融市場嘅ABC，只要港美息差存在，點解會突然「無人玩」？有啲乜嘢動機削弱套利機制？投資者對港元美元資產回報嘅信心會唔會影響套利？若果「套利機制死亡」呢種核彈級事件，點解全港銀行、外資行、金管局全部靜過太空？節目中「羅師傅」對以上解釋均為「零」。或許佢認為經濟學分析都遠超小市民能理解，唔適合小市民觀看，所以對於香港套息機制索性一字記之曰「亡」。

如果經濟學者嘅責任唔係用嚴謹數據支撐分析，而係用專業嚇人、誇張言論吸睛，咁不如直接請七師傅做你拍檔，至少人哋話美股「跌」，好歹都附送一個黃道吉日4月19啊！建議兩人組隊參加雙人脫口秀，一個合指算恆指，一個閉眼斷匯市，堪稱本港財經玄學界嘅「臥龍鳳雛」。

經濟學家嘅價值，在於用專業知識釐清市場迷霧，而非製造更多噪音。當一個博士嘅分析，連基本數據都唔能夠深入淺出解釋清楚，讓小市民明白，反而要靠陰謀論（銀行知但唔敢講）去自圓其說，咁同啲師傅話「我睇到鬼但你睇唔到」有咩分別？

觀眾唔介意多一個少一個玄學家論股市，但一個真正能開民智、敢言、有理有據嘅經濟博士，喺香港傳媒界，此時此刻，尤為重要。畢竟，我哋已經有足夠多嘅「師傅」，缺嘅係能夠點醒小市民嘅「博士」。