我也许在你眼中很丑，但我知道自己很美
我一直都好想写「专业」同「像样」的书评。
但谂谂吓，咁造作嘅嘢，大把人做紧，唔使多我一个。
所以老娘决定唔写「正经」嘅书评。
呢本书我觉得正嘅位系作者嘅真心。
佢细𠮶因为妈妈偏向严厉嘅教育方法，大咗变得好无自信，咩都唔敢做。
就连同妈妈讲「其实我唔钟意粉红色衫」，又或者系「我好想要一只金色手表」都唔敢。因为妈妈有自己既定嘅价值观，一旦作者嘅言行同妈妈嘅价值观有冲突时，妈妈就会极力地阻止同责骂。
作者一边唔知点同好恶嘅妈妈沟通；一边又唔识点样喺呢个环境自处。久而久之，佢做咗一个唔喜欢自己但又拼命讨好别人嘅烂好人。
直至有次佢喺朋友面前不断质疑自己能力同外貌时。佢朋友忍唔住问：「你到底俾咩人咁样话过你？」
作者答：「细𠮶有，依家无啦⋯⋯」
朋友即刻话：「咁即系唔系人哋话你，系你自己话自己唔得啦！点解要自我折磨呢？」
作者当刻好惊愕，慢慢回想细节同反思。
之后佢慢慢同小时候嘅自己和解，亦学识点样欣赏自己。
作者喺书中嘅分享好真实，无试图呃自己话我𠮶年代嘅父母十个九个都系咁㗎啦。佢无，佢喺最后𠮶章仲提到佢同屋企人断晒联络。
佢最尾有写一句说话俾小时候嘅自己：
「你可以唔原谅佢，但无必要继续记住过去。」
我有点感同身受。
我到依家都记得一位长辈同我讲：「你知唔知咩叫女为悦己者容呀？」
后生嘅我好幼稚，即刻答：「知呀！去拍拖一定要著靓裙仔呀嘛！」
长辈听到笑咗笑：「咁你可唔可以系𠮶个钟意自己嘅人呀？」
当时嘅我懵懵懂懂，唔系好明。
大个咗，终于明啦。
长辈系想教晓我一个道理：
1/ 呢个世界未必有一个人会永远钟意你，
2/ 但系你可以成为𠮶个永远爱自己同扶持自己嘅人。
突然有感而发，如果正巧睇到呢篇文嘅你质疑紧自己；心情有啲颓或者有啲阻滞唔知点算好。
我好想同你讲：唔怕！你仲有你自己！
如果你真系觉得走投无路，但又好想再次振奋。请你勇敢去揾一块镜，好好望吓镜中人。问吓佢，做啲咩会可以再次令两边嘴角向上扬？
共勉之💕
©本文由作者【Gideon】创作刊登于HKESE，如未经授权不得转载