我也許在你眼中很醜，但我知道自己很美
我一直都好想寫「專業」同「像樣」的書評。
但諗諗吓，咁造作嘅嘢，大把人做緊，唔使多我一個。
所以老娘決定唔寫「正經」嘅書評。
呢本書我覺得正嘅位係作者嘅真心。
佢細嗰因為媽媽偏向嚴厲嘅教育方法，大咗變得好無自信，咩都唔敢做。
就連同媽媽講「其實我唔鍾意粉紅色衫」，又或者係「我好想要一隻金色手錶」都唔敢。因為媽媽有自己既定嘅價值觀，一旦作者嘅言行同媽媽嘅價值觀有衝突時，媽媽就會極力地阻止同責駡。
作者一邊唔知點同好惡嘅媽媽溝通；一邊又唔識點樣喺呢個環境自處。久而久之，佢做咗一個唔喜歡自己但又拼命討好別人嘅爛好人。
直至有次佢喺朋友面前不斷質疑自己能力同外貌時。佢朋友忍唔住問：「你到底俾咩人咁樣話過你？」
作者答：「細嗰有，依家無啦⋯⋯」
朋友即刻話：「咁即係唔係人哋話你，係你自己話自己唔得啦！點解要自我折磨呢？」
作者當刻好驚愕，慢慢回想細節同反思。
之後佢慢慢同小時候嘅自己和解，亦學識點樣欣賞自己。
作者喺書中嘅分享好真實，無試圖呃自己話我嗰年代嘅父母十個九個都係咁㗎啦。佢無，佢喺最後嗰章仲提到佢同屋企人斷晒聯絡。
佢最尾有寫一句說話俾小時候嘅自己：
「你可以唔原諒佢，但無必要繼續記住過去。」
我有點感同身受。
我到依家都記得一位長輩同我講：「你知唔知咩叫女為悅己者容呀？」
後生嘅我好幼稚，即刻答：「知呀！去拍拖一定要著靚裙仔呀嘛！」
長輩聽到笑咗笑：「咁你可唔可以係嗰個鍾意自己嘅人呀？」
當時嘅我懵懵懂懂，唔係好明。
大個咗，終於明啦。
長輩係想教曉我一個道理：
1/ 呢個世界未必有一個人會永遠鍾意你，
2/ 但係你可以成為嗰個永遠愛自己同扶持自己嘅人。
突然有感而發，如果正巧睇到呢篇文嘅你質疑緊自己；心情有啲頹或者有啲阻滯唔知點算好。
我好想同你講：唔怕！你仲有你自己！
如果你真係覺得走投無路，但又好想再次振奮。請你勇敢去搵一塊鏡，好好望吓鏡中人。問吓佢，做啲咩會可以再次令兩邊嘴角向上揚？
共勉之💕
©本文由作者【Gideon】創作刊登於HKESE，如未經授權不得轉載