咁！你！肥！一！世！啦！ | Gideon

昨晚跟老爸閒聊。

他突然語重心長：「如果你真係想解決嗰兩個問題，就係呢這兩年啦。唔係老咗，就遲㗎啦！」

我：「甚麼？您指減重？腳板形問題？膝內扣？」

老爸：「還有腰間肉。反正就是所有令你老咗唔行得唔瞓得嘅嘢啦！要處理就快。」

我：「唉！好難！」

老爸先翻咗個白眼🙄，說：「食少兩餐老麥都搞掂啦！」

我：「做咩啫？其他茶記咪一樣係食加工食品，有好啲咩？」

老爸二翻白眼，極度無奈：「加工食品你咪唔好食，或者嗰量減半囉！點都好過老麥啦！咪同你講過囉！十幾年前已經通咗天啦。有個人忙得滯，放咗嗰漢堡包入櫃桶。一年後無意間見到佢。點知打開張包裝紙，嗰包嗰樣完全無變。咁你都仲敢食？你哋啲女人係咪真係咁鍾意防腐啫？！」

我見老爸開始嘔血，有少少淆底。但又唔忿氣拗佢唔贏。所以變細細聲咁問：「咁點啫？有咩可以食呀早餐？」

雖然老爸一副「我真係好想殺死你」嘅樣，但佢照答。

佢話：「反正就係食原形嘅食物，少食煎炸食品。三餐定時定量，唔準食零食。」

我聽完一臉驚恐：「咩算零食先？」

老爸直接擺出「生無可戀」的臉容：「除咗兩餐中間食嘅生果，其他都係零食！」

我：「吓😩！凰梨波波係希望！薄荷朱古力係空氣！燒烤味蝦條係拯救喎！」

老爸閉眼深呼吸咗兩秒，然後用好堅定嘅眼神咁望住我，同我講：「咁！你！肥！一！世！啦！」

K!O!