星*座

*不分先後，純粹個人感覺 *

摩羯/山羊座

身邊好多人都係山羊座，但係我覺得12月同1月份嘅羊真係唔同。

12月：擔心嘅事比1月份出世嘅羊更多，有時會極度焦慮，事情未發生前已經會作出最壞打算/ 亦有可能因此令身邊嘅人都會緊張。

如果你態度強硬，最初12月嘅羊會表示信任，但之後會繼續以其立場嘗試說服你/ 直到你一而再，再而三表明決心，12月山羊可能會再次表明觀點→最後選擇相信對方。

1月：可能因為踏入深冬，我總係比人一種冷若冰霜嘅感覺… 1月份山羊普遍第一印象都係比較嚴肅，有機會真係自我防禦機制作崇，好似難以接近，實際渴望被受認同。

對於生活，其實山羊座真係可以好用心。渴望穩定，希望可以穩住局面/ 唔介意重複有規律嘅生活模式，內心想法同計劃可以好多→希望能穩中求變。

金牛座

由於我身邊唔算太多金牛座朋友，感受到嘅無咁深入。

對於生活，金牛座女性可以因為工作上不快而怒火中燒，向家人表露無遺/ 對未能表示理解嘅人，女性金牛可以話走就走。

當認定一個人後，你希望對方可以融入家中，大家有講有笑，就好似朋友一樣。

******************************* ************************

雙子座

其實我知道你好想有人同你傾計。

你清楚自己喺咩環境要點做，只係突如其來嘅生活變化同你本身嘅期望有落差，而你選擇砍掉重練。

多面向或者會令你變得更加敏感，對於他人話語、肢體語言甚至係步伐作出雙重反應→造成某種程度上未能扭轉嘅局面。

天秤座

我好想知係咪多數天秤座都比較樂觀？

不過我認為你選擇嘅生活方式反映到你所追求嘅平衡，你有你把尺。係，係攰啲，但我知道你會去試，開頭係辛苦啲，我相信到最後你一定會得到你心中所想。我講真。

水瓶座

為咗愛，你可以去到幾盡？

疫情前後，我覺得大家都好似愛得死去活來。

除咗擔心自己同身邊人健康，更重要係大家份初心仍然存在嗎？曾經無數次嘅羈絆同挽留，引證一幕幕撼動人心嘅光景。祝福你，繼續守護住呢份情。

********************* ********* ********************** **

射手座

辛苦你。為咗家庭，你搏到盡。為咗兄弟，你在所不惜。為咗生活，你捱壞身體。希望你感到真正快樂，多謝你。

雖然大家真正交心嘅時間唔多，最記得係你毫不吝嗇讚賞身邊嘅人，其實一句說話真係可以令人開心一整日。

獅子座

你好meow?

中學畢業之後，我哋就好似無再見過。記得以前會喺你屋企平台打排球，第一次同你一齊用銀色眼線筆+橙粉色唇彩，張貼紙相仲喺度嗎？

多謝你同你屋企人當時招呼埋我一齊食飯，你仲記得你嚟我屋企，我幫你夾咗把秀髮，之後一齊去謝師宴嗎？話咁快就12年，我條裙仲喺度，你呢？

                                                    ***