【四两拨电话】

阖家去戏院捧港产片场，估唔到自己会成为成套片最好笑嘅笑位。老人家中途要去洗手间，落楼梯实在太黑，我紧随后面开手提电话灯照住堂楼梯，触动咗老豆神经，猛话：「唔驶唔驶」，聋爸其实唔知自己声量唔细，我冇争辩，怕嘈住人，默默做二仔底死跟，照一照安全啲好，有人要怪老人家我都冇办法，点知佢捩手拨开我，结果梗系拨埋我个电话落地，佢继续用「唔驶啦！」谂住打圆场，我深信佢系听唔到我「o殊」 佢，尴尬到一个点。去到门口，我冇再跟出去，费事佢再发难。返嚟嘅时候，佢主动走开去坐前排，唔再扰攘。我就顺势帮要返原来座位嘅阿妈，换来嘅结果，系快速返到位时家姐回头讲：「唔该。」先发现我唔系带位员。
完场后笑笑口同家人讲返件事，老豆仍然理直气壮觉得系我唔啱。我细细声揶揄佢话我电话坏咗要三千八蚊，佢谂都冇谂就拎自己部电话出嚟，叫我用佢𠮶部，非常精灵。
其实佢都唔系第一次拨开我，有次病到五颜六色都唔要人扶，一手揈开我，揈完自己企唔稳都试过，老人家就是任性，暂时佢系唯一一个可以拨开我而我冇嬲嘅人。(冇嬲，只系有吹涨感。)

#古法拨电话 #发老脾 #唔驶唔驶 #捩手拨开你
#吹涨感 #嘈到人唔好意思嘛 #老人家就是任性 #支持港产片 #hkmovie #撑戏院
photo credit #pxfuel