Don’t forget go little crazy

喺捷克的布拉格，同四位荷兰年青人，相处咗三日嘅时光。每次返嚟都会打声招呼。仲记得喺最后一晚，我问佢哋：征服著名酒吧嘅project，进度如何。佢哋话还好，战士都有倒下的时候，仍需继续努力。

果晚我喺枱面度，食紧蕃茄仔配沙律菜，再配上牛奶加麦皮；跟住我同佢哋讲：喺15年前，我系食紧麦当劳、麦乐鸡、薯条、炸鸡髀，跟住饮Voka沟Wiskey。跟住做咗个城大老鬼反枱嘅动作，当然我只系做个样讲吓笑。佢哋好语重心长咁安慰我，话有一个健康身体，呢样好紧要，我当堂得啖笑，因为好似同紧我阿爸讲嘢咁，但都好多谢佢咁理解我呢个中佬。

临别在即，喺最后一日离开嘅时候，其中一位年轻人讲咗句，我非常之深刻：All the best! Don’t forget go little crazy。其实我好想回应一句，来自我哋伟大嘅诗人：人生得意须尽欢，莫使金樽空对月。但英文我真系唔识译，我只能讲：You are right and I totally agree with you. 呢句系我中学时期学嘅Oral金句之一。

佢令我谂返起捷克之前，经过咗俄罗斯之旅，喺俄罗斯逗留咗大约一个月。仲记得啦，喺第二日嘅海参崴，我喺结冰嘅海上漫步，唔小心跌咗落冰底入边嘅海水到，搞到成身湿晒，差啲冻僵左，同世界讲Bye Bye。果次之后，我每经过一个东正教 教堂，我都会入去参拜，然后感谢主赐我生命，怀着感恩嘅心继续我嘅旅程。

呢一种疯狂，真系可一不可再，下次小心为上，留得青山在，哪怕冇柴烧，一定要喺安全环境之下进行旅程。呢样嘢都一直警惕住我，我相信系一个安全环境之下，跳出自己Comfort Zone， 再突破自己、挑战自己嘅感觉，系几正嘅。

希望透过呢个经历，令自己识得去平衡，冒险得黎，都要有专业嘅知识同埋良好嘅心态。虽然应该都冇咩作用，事后我都研习咗：如果跌咗落喺冰入边嘅时候，有啲咩应急措施。人生就算要疯狂，都要保住自己条命仔，讲紧无论系生理上定心理上。最后，Don’t forget go little crazy.

摄于海㟥崴，2024年2月16日