Don’t forget go little crazy

喺捷克的布拉格，同四位荷蘭年青人，相處咗三日嘅時光。每次返嚟都會打聲招呼。仲記得喺最後一晚，我問佢哋：征服著名酒吧嘅project，進度如何。佢哋話還好，戰士都有倒下的時候，仍需繼續努力。

果晚我喺枱面度，食緊蕃茄仔配沙律菜，再配上牛奶加麥皮；跟住我同佢哋講：喺15年前，我係食緊麥當勞、麥樂雞、薯條、炸雞髀，跟住飲Voka溝Wiskey。跟住做咗個城大老鬼反枱嘅動作，當然我只係做個樣講吓笑。佢哋好語重心長咁安慰我，話有一個健康身體，呢樣好緊要，我當堂得啖笑，因為好似同緊我阿爸講嘢咁，但都好多謝佢咁理解我呢個中佬。

臨別在即，喺最後一日離開嘅時候，其中一位年輕人講咗句，我非常之深刻：All the best! Don’t forget go little crazy。其實我好想回應一句，來自我哋偉大嘅詩人：人生得意須盡歡，莫使金樽空對月。但英文我真係唔識譯，我只能講：You are right and I totally agree with you. 呢句係我中學時期學嘅Oral金句之一。

佢令我諗返起捷克之前，經過咗俄羅斯之旅，喺俄羅斯逗留咗大約一個月。仲記得啦，喺第二日嘅海參崴，我喺結冰嘅海上漫步，唔小心跌咗落冰底入邊嘅海水到，搞到成身濕晒，差啲凍僵左，同世界講Bye Bye。果次之後，我每經過一個東正教 教堂，我都會入去參拜，然後感謝主賜我生命，懷着感恩嘅心繼續我嘅旅程。

呢一種瘋狂，真係可一不可再，下次小心為上，留得青山在，哪怕冇柴燒，一定要喺安全環境之下進行旅程。呢樣嘢都一直警惕住我，我相信係一個安全環境之下，跳出自己Comfort Zone， 再突破自己、挑戰自己嘅感覺，係幾正嘅。

希望透過呢個經歷，令自己識得去平衡，冒險得黎，都要有專業嘅知識同埋良好嘅心態。雖然應該都冇咩作用，事後我都研習咗：如果跌咗落喺冰入邊嘅時候，有啲咩應急措施。人生就算要瘋狂，都要保住自己條命仔，講緊無論係生理上定心理上。最後，Don’t forget go little crazy.

攝於海嵾崴，2024年2月16日