捷克有感 on 5.5.2024

唔经唔觉，自己出走已经有半年之多，有啲人可能觉得只系一段短嘅时间，但对我嚟讲呢一段时间，好似越嚟越长，好似进击的巨人咁样，不断前进。原先攞辞后，计划系想环游中国嘅大江南北，名山名川，希望可以探索下中国嘅自然景观，了解一下中国情坏，但都唔知点解呢一刻嚟到捷克。

琴日喺hostel遇到四位嘅年青人，佢哋大约19至21岁，来自荷兰。第一晚觉得佢哋好嘈好滋扰，夜晚又不断去酒吧，劈酒沟女；凌晨先返到去房间𠮶度噼哩啪啦。虽然我有耳塞同埋眼罩，但都比佢哋嘈醒咗几次，可能我之前𠮶行都习惯咗有呢种嘅感觉，所以都唔系话太嬲。

去到朝头早，同佢哋一齐食早餐倾偈嘅时候，我发觉佢哋真系好有energy，真系精力充沛，见到好似15年前嘅自己咁样，跟住自己就喺Facebook揾咗张相。

张相系升中五暑假嘅时候，同死党一齐去台湾旅行，仲记得大家三五知己瞓同一张床，跟住上叠下、下叠上、左右搭嚟搭去，训到好似层层叠咁，跟住又周围去玩，去揾酒吧、去clubbing沟女，𠮶时觉得自己简直系无限精力，过度活跃。但可惜嘅系，几年前，喺相中嘅一位朋友，已经因为癌症而离世，果时感觉好突然，同时都觉得生命真系可以好短暂。跟住我攞呢幅相去同果4位年青人分享，佢哋都呆咗，觉得咁年轻就走。

我为免长气，讲左几句，当人大咗，你有家庭、有父母期望、有工作嘅需要，大家其实就会好难去夹到时间。我哋之前一路有夹，由出国旅行、再去到神州北上、跟住再去到长洲聚会都唔成功，跟住过节先去到某个朋友嘅屋企聚会，大家先得以成功见面。

佢哋仲话，想去哂捷克布拉格嘅所有著名酒吧，我回应：你地在座都系一位勇敢战士！衷心希望佢哋可以享受年青嘅时光，青春系一去不复返，只能够老土咁讲句，生命好短暂，过去自己𠮶行亦见到好多生离死别。同佢哋倾完偈之后，都有少少感触，睇返幅相亦都提自己活在当下，有呼吸嘅气息，其实已经好满足。
 

捷克之旅，特此记录。