捷克有感 on 5.5.2024

唔經唔覺，自己出走已經有半年之多，有啲人可能覺得只係一段短嘅時間，但對我嚟講呢一段時間，好似越嚟越長，好似進擊的巨人咁樣，不斷前進。原先攞辭後，計劃係想環遊中國嘅大江南北，名山名川，希望可以探索下中國嘅自然景觀，了解一下中國情壞，但都唔知點解呢一刻嚟到捷克。

琴日喺hostel遇到四位嘅年青人，佢哋大約19至21歲，來自荷蘭。第一晚覺得佢哋好嘈好滋擾，夜晚又不斷去酒吧，劈酒溝女；凌晨先返到去房間嗰度噼哩啪啦。雖然我有耳塞同埋眼罩，但都比佢哋嘈醒咗幾次，可能我之前嗰行都習慣咗有呢種嘅感覺，所以都唔係話太嬲。

去到朝頭早，同佢哋一齊食早餐傾偈嘅時候，我發覺佢哋真係好有energy，真係精力充沛，見到好似15年前嘅自己咁樣，跟住自己就喺Facebook搵咗張相。

張相係升中五暑假嘅時候，同死黨一齊去台灣旅行，仲記得大家三五知己瞓同一張床，跟住上疊下、下疊上、左右搭嚟搭去，訓到好似層層疊咁，跟住又周圍去玩，去搵酒吧、去clubbing溝女，嗰時覺得自己簡直係無限精力，過度活躍。但可惜嘅係，幾年前，喺相中嘅一位朋友，已經因為癌症而離世，果時感覺好突然，同時都覺得生命真係可以好短暫。跟住我攞呢幅相去同果4位年青人分享，佢哋都呆咗，覺得咁年輕就走。

我為免長氣，講左幾句，當人大咗，你有家庭、有父母期望、有工作嘅需要，大家其實就會好難去夾到時間。我哋之前一路有夾，由出國旅行、再去到神州北上、跟住再去到長洲聚會都唔成功，跟住過節先去到某個朋友嘅屋企聚會，大家先得以成功見面。

佢哋仲話，想去哂捷克布拉格嘅所有著名酒吧，我回應：你地在座都係一位勇敢戰士！衷心希望佢哋可以享受年青嘅時光，青春係一去不復返，只能夠老土咁講句，生命好短暫，過去自己嗰行亦見到好多生離死別。同佢哋傾完偈之後，都有少少感觸，睇返幅相亦都提自己活在當下，有呼吸嘅氣息，其實已經好滿足。
 

捷克之旅，特此記錄。