3月号读书报告 岩井俊二《情书》 电影背后嘅好文笔

讲到日本导演岩井俊二，就会谂起文青情情爱爱电影，写实同时带有情理之外嘅设定同情节，例如《花与爱丽丝》中女高中生花呃失忆男学生自己系佢女朋友，男学生失忆嘅原因竟然系耷低头睇书撞亲头；又例如今次讲嘅《情书》系女主角寄信去已死嘅未婚夫已被改建成公路嘅老家地址，竟然收到未婚夫回信。

以上例子，都可定义为老土，十足《爱回家》嘅沟片情节。但岩井俊二就喺「柒」同「文青」嘅一线之间玩杂耍，建立出独特风格。老土情节喺佢镜头下反而成为有效敍事嘅看点，甚至被视作诗意。睇《情书》嘅时候，其实有一种睇村上春树《挪威的森林》嘅感觉；淡然而可细味，小许魔幻但同时又十分写实。所以今次拜读《情书》小说版，睇一睇《爱回家》情节，点样写得出文青味道。

抒情之书

故事讲述藤本树去世两年，前未婚妻渡边搏子喺前未来奶奶手中得到前未婚夫中学回忆录，入面有藤井树老家地址，不过老家早就拆咗改建成公路。搏子因为思念，向前未婚夫嘅老家寄出一封信以解相思之苦：

「藤井树

你好吗？我很好？

渡边博子」

以现实世界嚟讲，寄完情书嘅一刻，主角嘅心情已经抒发好发泄好，早啲瞓第二日准备返工。但出奇嘅系，博子竟然收到信，一个自称藤本树嘅人回信写自己感冒。故事切入第二个主角，藤井树，一个与搏子去世嘅前未婚夫同名同姓同校同班三年嘅女仔。

无咁桥挂

系咪巧合到老土呢！作者当然知道剧情老土啦，但佢就懂得避重就轻，令老土点唔好发大。例如博子喺收到藤井树（女）嘅回信后，花唔短文字喺博子同朋友如何解释回信嘅由来。博子代表嘅浪漫者当然系好开心，想继续同哩个「藤井树」交流；但朋友秋叶反而唔想博子同佢交流，因为佢自己都钟意博子，希望佢快啲走出藤井树已死嘅阴影；另一边厢，不停收到信嘅藤井树（女）当然会感到烦厌，对方（秋叶）更曾要求自己证明自己系藤井树。基本上书中前三分一以悬疑剧方式描写真假「藤井树」。然后都故事嘅一半开始反转，原来以前有一间中学，班中有两个人都叫藤井树，一男一女。故事就加入一个新疑问，就系「博子」同「藤井树（女）」外表好相似。
 

女人嘅直觉

去到哩一度博子就好嬲啦。因为藤井树（男）第一次见到佢果时就用话自己对佢一见钟情，想同佢拍拖。（所以唔好话现代人随便，以前嘅人只要系靓仔靓女都有随便嘅本钱）但系当博子知道原来藤井树（男）喺中学时有过一段咁奇幻嘅缘份。就极度好奇两位藤井树曾经嘅关系。书中大胆用两人对信做一个大章节嘅主轴，以书信形式写小说的确唔小见，但系纯书信嘅处理手法喺流行文学上系有难度。要将问答化成文笔写喺信中，而信同信之间系有时间差，并非问完a答a，再答b，而系一方问abcd另一方一次过回答。要做到唔难，但重点系要观众跟得上故事，同时不低俗套不失趣味。哩个位小说比电影做得更好。而讲返故事，藤井树（女）其实好反感有一个同名同姓嘅人喺身边，喺中学鸡时期绝对会成为众人焦点，而学校都应该有份撚化佢哋，两人三年都同班。所以两人都有意唔交流咁多。

看似单纯之爱

情书中并没有贵圈真乱嘅人际关系，只有博子嘅「思念」同藤井树嘅「回想」，本应该系纯如水嘅故事。但从博子嘅好奇，藤井树（男）嘅奇怪，以及藤井树（女）嘅客观回忆。三人中，只有藤井树（男）知道自己系咪对博子真系一见钟情，系咪对藤井树（女）有过感情。但哩个角色，而小说嘅第一句开始已经唔存在。一个事隔多年误会变成一个奇怪嘅三角关系，感情描写真实而不失趣味。感情中唔了解对方感受嘅心态，更成为角色之间认知嘅矛盾。可能感情唔复杂，复杂嘅系错过过甚么，而现在有甚么。

（都叫坚持到3个月，希望下一个月可以睇一本非小说类书本。哩个系列难度在于，我真系会睇完一本书，但系唔系每一本书都好推介，好似今日嘅《情书》（先指声明好睇嘅），好睇但唔知点介绍。不过，摸索去写一啲自己擅长嘅文都未尝唔系一个好练习。）