3月號讀書報告 岩井俊二《情書》 電影背後嘅好文筆

講到日本導演岩井俊二，就會諗起文青情情愛愛電影，寫實同時帶有情理之外嘅設定同情節，例如《花與愛麗絲》中女高中生花呃失憶男學生自己係佢女朋友，男學生失憶嘅原因竟然係耷低頭睇書撞親頭；又例如今次講嘅《情書》係女主角寄信去已死嘅未婚夫已被改建成公路嘅老家地址，竟然收到未婚夫回信。

以上例子，都可定義為老土，十足《愛回家》嘅溝片情節。但岩井俊二就喺「柒」同「文青」嘅一線之間玩雜耍，建立出獨特風格。老土情節喺佢鏡頭下反而成為有效敍事嘅看點，甚至被視作詩意。睇《情書》嘅時候，其實有一種睇村上春樹《挪威的森林》嘅感覺；淡然而可細味，小許魔幻但同時又十分寫實。所以今次拜讀《情書》小說版，睇一睇《愛回家》情節，點樣寫得出文青味道。

抒情之書

故事講述藤本樹去世兩年，前未婚妻渡邊搏子喺前未來奶奶手中得到前未婚夫中學回憶錄，入面有藤井樹老家地址，不過老家早就拆咗改建成公路。搏子因為思念，向前未婚夫嘅老家寄出一封信以解相思之苦：

「藤井樹

你好嗎？我很好？

渡邊博子」

以現實世界嚟講，寄完情書嘅一刻，主角嘅心情已經抒發好發洩好，早啲瞓第二日準備返工。但出奇嘅係，博子竟然收到信，一個自稱藤本樹嘅人回信寫自己感冒。故事切入第二個主角，藤井樹，一個與搏子去世嘅前未婚夫同名同姓同校同班三年嘅女仔。

無咁橋掛

係咪巧合到老土呢！作者當然知道劇情老土啦，但佢就懂得避重就輕，令老土點唔好發大。例如博子喺收到藤井樹（女）嘅回信後，花唔短文字喺博子同朋友如何解釋回信嘅由來。博子代表嘅浪漫者當然係好開心，想繼續同哩個「藤井樹」交流；但朋友秋葉反而唔想博子同佢交流，因為佢自己都鐘意博子，希望佢快啲走出藤井樹已死嘅陰影；另一邊廂，不停收到信嘅藤井樹（女）當然會感到煩厭，對方（秋葉）更曾要求自己證明自己係藤井樹。基本上書中前三分一以懸疑劇方式描寫真假「藤井樹」。然後都故事嘅一半開始反轉，原來以前有一間中學，班中有兩個人都叫藤井樹，一男一女。故事就加入一個新疑問，就係「博子」同「藤井樹（女）」外表好相似。
 

女人嘅直覺

去到哩一度博子就好嬲啦。因為藤井樹（男）第一次見到佢果時就用話自己對佢一見鍾情，想同佢拍拖。（所以唔好話現代人隨便，以前嘅人只要係靚仔靚女都有隨便嘅本錢）但係當博子知道原來藤井樹（男）喺中學時有過一段咁奇幻嘅緣份。就極度好奇兩位藤井樹曾經嘅關係。書中大膽用兩人對信做一個大章節嘅主軸，以書信形式寫小說的確唔小見，但係純書信嘅處理手法喺流行文學上係有難度。要將問答化成文筆寫喺信中，而信同信之間係有時間差，並非問完a答a，再答b，而係一方問abcd另一方一次過回答。要做到唔難，但重點係要觀眾跟得上故事，同時不低俗套不失趣味。哩個位小說比電影做得更好。而講返故事，藤井樹（女）其實好反感有一個同名同姓嘅人喺身邊，喺中學雞時期絕對會成為眾人焦點，而學校都應該有份撚化佢哋，兩人三年都同班。所以兩人都有意唔交流咁多。

看似單純之愛

情書中並沒有貴圈真亂嘅人際關係，只有博子嘅「思念」同藤井樹嘅「回想」，本應該係純如水嘅故事。但從博子嘅好奇，藤井樹（男）嘅奇怪，以及藤井樹（女）嘅客觀回憶。三人中，只有藤井樹（男）知道自己係咪對博子真係一見鍾情，係咪對藤井樹（女）有過感情。但哩個角色，而小說嘅第一句開始已經唔存在。一個事隔多年誤會變成一個奇怪嘅三角關係，感情描寫真實而不失趣味。感情中唔了解對方感受嘅心態，更成為角色之間認知嘅矛盾。可能感情唔復雜，復雜嘅係錯過過甚麼，而現在有甚麼。

（都叫堅持到3個月，希望下一個月可以睇一本非小說類書本。哩個系列難度在於，我真係會睇完一本書，但係唔係每一本書都好推介，好似今日嘅《情書》（先指聲明好睇嘅），好睇但唔知點介紹。不過，摸索去寫一啲自己擅長嘅文都未嘗唔係一個好練習。）