人算不如天算之想算? 都系算啦

有时有啲嘢真系唔到你唔服同人算真系不如天算，相信应该冇人会谂到出街食个饭会食到叫白车入急症室，而且原因而家谂返都觉得好滑稽，我早两日就亲身体验咗一次。

好啦，谂住星期日同朋友去连锁寿司店食午餐，咁都食得几开心嘅，但点知灾难经已慢慢靠近。事关最近笔者终于下定决心去咗箍牙，冇错，仲要擘大个口会畀人话钢牙仔／妹个只。咁相信大家都知箍咗牙嘅人每次食完嘢都会好狼狈，要尽最大可能咁清洁牙箍上面嘅食物残渣，咁我都唔例外，可能系我起势咁用条脷去左穿右插嘅关系，突然之间，发现条脷郁唔到，口都擘唔开，当时嘅我仲未意识到发生咩事，下一秒发现原来脷底条筋畀牙箍夹住咗，我开始用筷子试下挑唔挑得甩，失败，再用牙签，失败，甚至叫朋友代劳，因为我睇唔清楚自己条脷嘅情况，通通冇用。

当下我个人开始慌，去咗商场厕所照镜希望睇下有冇办法自行解脱，好明显凭我一己之力加上每分每秒都感受到有嘢夹住条脷筋，最终都系宣告败北。我个脑开始谂而家要做咩，朋友提议去揾最近嘅牙医，但好死唔死𠮶日系星期日，牙医点会开。我哋唔信邪，喺GOOLE地图见到有间冇写营业时间嘅牙医诊所，谂住搏一搏，于是搭巴士去到门口当然发现铁门紧闭。见到咁嘅情况我无论系心理同身理都承受住极大痛楚同不安，我喺电话上面㩒完１１９就递咗畀朋友，叫佢帮我同报案中心讲咩事，最终叫咗架白车嚟车我去医院。

几分钟之后白车就接咗我，救护员见到我都讲唔到嘢就叫我点头拧头回答佢问题，简单答完之后就开始往最近嘅医院进发。讲真生平真系第一次叫白车畀自己同坐白车，坐喺上面听到响住警号，望住出面啲车不停让路，心情非常复杂，唔知其他车入面嘅司机知道有条傻佬食食下嘢夹住自己条脷要去急症会点谂，而我就系个傻佬。但其实另一边厢我系好惊，同时幻想紧自己会唔会失去条脷，虽然咁谂好似夸张咗。

大约十分钟左右就去到急症，姑娘好快帮我分流完就叫我去旁边等叫名。当时我仍然系口齿不清讲唔到嘢，同时间亦见到几个从外观望就知唔惹小嘅病人都等紧，我更加五味杂陈。

卒之等到姑娘叫我名入房见医生，医生一开始唔太明白我系咩环境，佢叫我擘大口坐喺佢隔篱，佢思索完一番之后叫我瞓上床。于是开始用工具逐啲逐啲挑起被夹住嘅脷筋，然后同时叫我试下伸条脷出嚟，最终成功分离，而我都同脷筋分离，事关有一小部份系断咗，我唔系好清楚佢会唔会自己生返，因为我未见过有人喺个个地方受伤，希望时间会畀一个答案我。

由于系第一身经历，写返件事出嚟嘅时候都好似又经历多次，所以用全口语好似逼真同直接啲。