人算不如天算之想算? 都係算啦

有時有啲嘢真係唔到你唔服同人算真係不如天算，相信應該冇人會諗到出街食個飯會食到叫白車入急症室，而且原因而家諗返都覺得好滑稽，我早兩日就親身體驗咗一次。

好啦，諗住星期日同朋友去連鎖壽司店食午餐，咁都食得幾開心嘅，但點知災難經已慢慢靠近。事關最近筆者終於下定決心去咗箍牙，冇錯，仲要擘大個口會畀人話鋼牙仔／妹個隻。咁相信大家都知箍咗牙嘅人每次食完嘢都會好狼狽，要盡最大可能咁清潔牙箍上面嘅食物殘渣，咁我都唔例外，可能係我起勢咁用條脷去左穿右插嘅關係，突然之間，發現條脷郁唔到，口都擘唔開，當時嘅我仲未意識到發生咩事，下一秒發現原來脷底條筋畀牙箍夾住咗，我開始用筷子試下挑唔挑得甩，失敗，再用牙籤，失敗，甚至叫朋友代勞，因為我睇唔清楚自己條脷嘅情況，通通冇用。

當下我個人開始慌，去咗商場廁所照鏡希望睇下有冇辦法自行解脫，好明顯憑我一己之力加上每分每秒都感受到有嘢夾住條脷筋，最終都係宣告敗北。我個腦開始諗而家要做咩，朋友提議去搵最近嘅牙醫，但好死唔死嗰日係星期日，牙醫點會開。我哋唔信邪，喺GOOLE地圖見到有間冇寫營業時間嘅牙醫診所，諗住搏一搏，於是搭巴士去到門口當然發現鐵門緊閉。見到咁嘅情況我無論係心理同身理都承受住極大痛楚同不安，我喺電話上面㩒完１１９就遞咗畀朋友，叫佢幫我同報案中心講咩事，最終叫咗架白車嚟車我去醫院。

幾分鐘之後白車就接咗我，救護員見到我都講唔到嘢就叫我點頭擰頭回答佢問題，簡單答完之後就開始往最近嘅醫院進發。講真生平真係第一次叫白車畀自己同坐白車，坐喺上面聽到響住警號，望住出面啲車不停讓路，心情非常複雜，唔知其他車入面嘅司機知道有條傻佬食食下嘢夾住自己條脷要去急症會點諗，而我就係個傻佬。但其實另一邊廂我係好驚，同時幻想緊自己會唔會失去條脷，雖然咁諗好似誇張咗。

大約十分鐘左右就去到急症，姑娘好快幫我分流完就叫我去旁邊等叫名。當時我仍然係口齒不清講唔到嘢，同時間亦見到幾個從外觀望就知唔惹小嘅病人都等緊，我更加五味雜陳。

卒之等到姑娘叫我名入房見醫生，醫生一開始唔太明白我係咩環境，佢叫我擘大口坐喺佢隔籬，佢思索完一番之後叫我瞓上床。於是開始用工具逐啲逐啲挑起被夾住嘅脷筋，然後同時叫我試下伸條脷出嚟，最終成功分離，而我都同脷筋分離，事關有一小部份係斷咗，我唔係好清楚佢會唔會自己生返，因為我未見過有人喺個個地方受傷，希望時間會畀一個答案我。

由於係第一身經歷，寫返件事出嚟嘅時候都好似又經歷多次，所以用全口語好似逼真同直接啲。