（又）AI大革命 OpenAI Sora横空出世

话说，前几日起身又畀朋友炸我signal，话我又准备冇工开。原来佢讲紧OpenAI新出嘅生成影片软件Sora，可以用文字gen图咁gen片，流畅度同细节都有大突破。片中有讲求高真实感嘅日本街头、媲美pixar 3D电影角色嘅细致毛发、各国风情嘅stock video……引来一时热话。小弟作为影视创作人，当然都要跟下流量啦，我嘅睇法系----我出番去做野先啦。

当然啦，我话我唔担心你都唔信。毕竟哩个技术系令你我他我阿妈，只要识个字就可以做到一条--可能要做10个钟，用一万蚊拍先制作到嘅片。但反转谂，轮到我去怕咩。我哋香港人连用都无得用，怕又可以点？

如果无AI就好？

大家咁惊AI，难道冇AI就会飞黄腾达咩？反之，难道有AI我哋真系无得捞咩？影片中可见，北极嘅长毛象喺雪地奔驰，四驱车喺山上旅程，日本樱花雪景下情侣慢步……等等等等嘅影片，我谂咁多位包括我，都唔会咁轻易拍得出啦。咁AI做到我本身做唔到嘅嘢，又唔存在抢饭碗㖞。

香港唔系行业龙头，不论系科技同影视我哋都跑输人地十几条村。（虽然电影「曾经」好光彩，但当时都未系最新科技，依家更加唔洗讲）讲讲行业龙头美国，Marvel剧集秘密入侵用AI做opening喺当地产生好大回响，当时Marvel编剧仲罢工紧。正正系因为咁，AI先唔系威胁都创作者嘅凶手，因为喺AI出现前，威胁紧创作者嘅系「老板」。喺Marvel做嘅员工称其公司为「血汗工厂」。讲真AI都只不过系新技术，老板要唔重用人才，我哋都吹佢唔胀。但客观睇，AI本身都要人去「咏唱」，有条片出嚟都仲要慢慢执，执片嘅咪都系人。短期内会对行业有太大影响。

影视行业百变怪

我会咁老定嘅第二个原因，因为影视行业本来就系一多变嘅行业。1982年，第一个CGI连续镜头喺《星空奇遇记II：大汗的愤怒》出现；1985年，《出神入化：少年福尔摩斯》中出现第一个CGI人物 ；1986年出现第一套3D动画《Toy Story》；1991年《Terminator 2》 先有第一个CGI主角；都不过系十年嘅事。科技向高发展同时都会普及，今日我同你人人都有一部影到相拍到片嘅电话，难道Apple又影响左影视行业咩。

大风大浪中生存嘅人，唔识滑浪都要识企喺板挂？科技发明咗就系发明咗，冇得同人讲「不如唔好发明，番转头」，咁就未免太守旧太TVB啦。AI最大威胁系成长能力。由一开始出到好假嘅片，例如HSBC整嘅AI黄子华、Marvel秘密入侵嘅AI opening、以至711广告，至早几日Sora暂露头角，都只不过系半年内嘅事。但系都真系通街都做AI做片嘅时候，出嚟「捞」得嘅，个个都会识啲啲AI架啦。唔通以前用菲林拍电影嘅师傅今日唔识用Sony FX6（sony片机（非广告）咩？唔好觉得菲林同依家差好远，过年睇嘅「呖咕呖咕新年财」2002年上映，都仲系菲林拍。其实数码相机面世都只不过系短短廿几年。而哩廿几年一定有新科技嘅啦，惊科技嘅唔通去拍番菲林咩？（其实我想，不过冇钱，我都想我系Christopher Nolan）

立新都不一定要破旧

科技上，AI会系一个突破。但潮流上，可见嘅未来会有大量AI影片出现喺各大品牌。stock video市场会先大缩水，再来就会系各行业龙头，美国mv、时装LV、电子广告都一定会慢慢用AI。立新都不一定要破旧，我哋做过嘅片，都有价值，至少美学元素、经验都系唔会错。AI系工具，都系一重视觉风格，唔好因为一个工具放弃过往风格。

若果有一日香港可以用，就辛苦下我部电脑试gen几条啦。人生在世，廿几岁人，其实都系要不停学习同试野架啦。香港人，执生啦。