（又）AI大革命 OpenAI Sora橫空出世

話說，前幾日起身又畀朋友炸我signal，話我又準備冇工開。原來佢講緊OpenAI新出嘅生成影片軟件Sora，可以用文字gen圖咁gen片，流暢度同細節都有大突破。片中有講求高真實感嘅日本街頭、媲美pixar 3D電影角色嘅細緻毛髮、各國風情嘅stock video……引來一時熱話。小弟作為影視創作人，當然都要跟下流量啦，我嘅睇法係----我出番去做野先啦。

當然啦，我話我唔擔心你都唔信。畢竟哩個技術係令你我他我阿媽，只要識個字就可以做到一條--可能要做10個鐘，用一萬蚊拍先製作到嘅片。但反轉諗，輪到我去怕咩。我哋香港人連用都無得用，怕又可以點？

如果無AI就好？

大家咁驚AI，難道冇AI就會飛黃騰達咩？反之，難道有AI我哋真係無得撈咩？影片中可見，北極嘅長毛象喺雪地奔馳，四驅車喺山上旅程，日本櫻花雪景下情侶慢步……等等等等嘅影片，我諗咁多位包括我，都唔會咁輕易拍得出啦。咁AI做到我本身做唔到嘅嘢，又唔存在搶飯碗喎。

香港唔係行業龍頭，不論係科技同影視我哋都跑輸人地十幾條村。（雖然電影「曾經」好光彩，但當時都未係最新科技，依家更加唔洗講）講講行業龍頭美國，Marvel劇集秘密入侵用AI做opening喺當地產生好大迴響，當時Marvel編劇仲罷工緊。正正係因為咁，AI先唔係威脅都創作者嘅兇手，因為喺AI出現前，威脅緊創作者嘅係「老闆」。喺Marvel做嘅員工稱其公司為「血汗工廠」。講真AI都只不過係新技術，老闆要唔重用人才，我哋都吹佢唔脹。但客觀睇，AI本身都要人去「詠唱」，有條片出嚟都仲要慢慢執，執片嘅咪都係人。短期內會對行業有太大影響。

影視行業百變怪

我會咁老定嘅第二個原因，因為影視行業本來就係一多變嘅行業。1982年，第一個CGI連續鏡頭喺《星空奇遇記II：大汗的憤怒》出現；1985年，《出神入化：少年福爾摩斯》中出現第一個CGI人物 ；1986年出現第一套3D動畫《Toy Story》；1991年《Terminator 2》 先有第一個CGI主角；都不過係十年嘅事。科技向高發展同時都會普及，今日我同你人人都有一部影到相拍到片嘅電話，難道Apple又影響左影視行業咩。

大風大浪中生存嘅人，唔識滑浪都要識企喺板掛？科技發明咗就係發明咗，冇得同人講「不如唔好發明，番轉頭」，咁就未免太守舊太TVB啦。AI最大威脅係成長能力。由一開始出到好假嘅片，例如HSBC整嘅AI黃子華、Marvel秘密入侵嘅AI opening、以至711廣告，至早幾日Sora暫露頭角，都只不過係半年內嘅事。但係都真係通街都做AI做片嘅時候，出嚟「撈」得嘅，個個都會識啲啲AI架啦。唔通以前用菲林拍電影嘅師傅今日唔識用Sony FX6（sony片機（非廣告）咩？唔好覺得菲林同依家差好遠，過年睇嘅「嚦咕嚦咕新年財」2002年上映，都仲係菲林拍。其實數碼相機面世都只不過係短短廿幾年。而哩廿幾年一定有新科技嘅啦，驚科技嘅唔通去拍番菲林咩？（其實我想，不過冇錢，我都想我係Christopher Nolan）

立新都不一定要破舊

科技上，AI會係一個突破。但潮流上，可見嘅未來會有大量AI影片出現喺各大品牌。stock video市場會先大縮水，再來就會係各行業龍頭，美國mv、時裝LV、電子廣告都一定會慢慢用AI。立新都不一定要破舊，我哋做過嘅片，都有價值，至少美學元素、經驗都係唔會錯。AI係工具，都係一重視覺風格，唔好因為一個工具放棄過往風格。

若果有一日香港可以用，就辛苦下我部電腦試gen幾條啦。人生在世，廿幾歲人，其實都係要不停學習同試野架啦。香港人，執生啦。