漫画分享 《地。-关于地球的运动-》

最近拜读一套漫画 《地。-关于地球的运动-》（日文：チ。-地球の运动について-），先总结一下，系一部令人「感动」嘅作品，有关宗教内容反讽令我谂起卡缪著作《异乡人》，同时又有大卫．米契尔著作《云图》世界观嘅宏大感（当然章节结构冇咁乱）。从作品名就知故事系关于地球转动。当然我哋人在廿一世纪，幼稚园学生都知道地球有自转公转，有咩咁吸引啊？但读过中学世界历史嘅都知道，曾经喺街发表「地球系圆嘅」或者「地球围住太阳转」，系会畀人拉，甚至会死。

故事设定喺15世纪，一个教会信仰大于一切，大学「神科」就系神学嘅时期。每一个人「常识」中，「知道」地球就系世界中心，同时系世界最污糟邋遢嘅底层，只有相信神，先可以上天堂。就算觉得唔多合理，都系神嘅安排，系人类太低等理解唔到啫。聪明仔女都系出少句声，一阵畀人当「异端」，畀「异端审判者」捉第一次就打镬甘，捉第二次死得人。然而，就有一班「异端」不停研究天象，证明星星太阳月亮唔系围住地球转，证明地球有自转有公转嘅「地动说」。

灵光一闪 番唔到转头

故事分成三个大编章一个小编章，三大编章都系围绕「异端」vs「异端审判者」。「异端审判者」有权力有武力，仲要好超级敏感嘅恶犬，基本上一畀佢闻到蛛丝马迹，就满清十大酷刑侍候。反之「异端」就要喺冇资源，冇资料嘅世界，睇个星星都可以畀人捉嘅环境下，研究一个无人相信嘅学说。每一次睇角色谂计仔瞒天过海，一边研究，一边要烧晒啲研究废事畀人周到正，好似睇紧「无间道」 咁剧力万钧，真系睇到拍晒手掌。

可能大家会觉得好戆居，就算真系证明咗「地动说」，听日咪都系继续番工。故事中「异端审判者」都有帮观众问各位「异端」：

异端审判者话：「明明比机会你放弃研究就无事，做咩要咁硬颈？」
异端：「我唔放弃，对『地动说』证明更有利。你嘅敌人唔系我，唔系『异端』，系人嘅好奇心，系『知性』。」

合理 唔一定优美 错误 都唔一定亳无意义

角色们都做自以为「合理」嘅事；「异端审判者」觉得「异端」影响社会安宁，死咗都合理；有人为咗钱；有人为咗生存；有人为升官；都有人为报复……

为咗唔剧透太多我举第一个主角做例，天才学生拉斐尔信念系做「合理」嘅人，讲好听嘅说话，做神嘅孩子，12岁就升读大学。但当佢接触「地动说」后，睇世界嘅方式唔同咗，睇到更多行星万物规律，漫画中用「星空」做引子，相信「地动说」嘅人，睇到每一粒星啲轨迹，咁嘅星空系令人「感动」。正正系被「感动」，番唔到转头。（通俗讲，当大家知道KFC logo系一个火柴人手脚加肯德基叔叔嘅大头，大家都番唔到转头，忘不了啦。） 因为「感动」，佢选择唔去做大家眼中嘅「合理」事，而系主动去理解世界真理。尽管人人话佢错，甚至作为现代人嘅我哋都知佢嘅「地动说」系有错。但系错，都唔代表亳无意义，特别喺科学，错都系一个证明，一个理论嘅实践。

集文学/美学/哲学之大成

原文名字中「チ」（chi），而日文中地壳嘅「地」、血液嘅「血」同知识嘅「知」都系发「チ」音。日文嘅一字多意令佢喺文学上多咗一份调味，浓淡刚好又不至于味精般俗气。而作为科学漫画，当中理论解释唔会将漫画分镜变成小说。而系分开编章慢慢解释，系一个浅白嘅科学证明题。而作者鱼豊老师系读哲学出身，作品加入唔少对应情节嘅哲学名句，例如某人死前（注，都几多人死下）引用苏格拉底名言「没有人尝试过死亡的滋味，人却都将其视为最大的恶。」深入浅出对白与证明，更令本作意思入木三分。

本作平衡深度娱乐，更出色嘅系每一个角色都有合理动机，亦有发挥空间。十个角色有十个「合理」，继而引发冲突，无一个人完全对错，表面上「异端审判者」系奸角，但从佢哋角度出发，又合情合理。所以我反而觉得剧中反派系「世界」，或者称为「神」。

因为三大编章后，有一个平衡世界，系可以讨论「地动说」嘅世界，「知性」一啲嘅世界。好似推翻三大编章嘅故事，但同时有画龙点睛之妙----「知性」都唔一定啱。更甚者，我哋睇到嘅世界都唔一定正确，保持思考。引用剧中名句：「迷惘之中就一定会有伦理存在。」

本作获得奖项：

漫画大奖2021第2位

下一部人气漫画大赏2021第10位

《这本漫画真厉害！2022》男生篇第2位

第26届手冢治虫文化奖漫画大奖（同时为该奖最年轻得奖者）