漫畫分享 《地。-關於地球的運動-》

最近拜讀一套漫畫 《地。-關於地球的運動-》（日文：チ。-地球の運動について-），先總結一下，係一部令人「感動」嘅作品，有關宗教內容反諷令我諗起卡繆著作《異鄉人》，同時又有大衛．米契爾著作《雲圖》世界觀嘅宏大感（當然章節結構冇咁亂）。從作品名就知故事係關於地球轉動。當然我哋人在廿一世紀，幼稚園學生都知道地球有自轉公轉，有咩咁吸引啊？但讀過中學世界歷史嘅都知道，曾經喺街發表「地球係圓嘅」或者「地球圍住太陽轉」，係會畀人拉，甚至會死。

故事設定喺15世紀，一個教會信仰大於一切，大學「神科」就係神學嘅時期。每一個人「常識」中，「知道」地球就係世界中心，同時係世界最污糟邋遢嘅底層，只有相信神，先可以上天堂。就算覺得唔多合理，都係神嘅安排，係人類太低等理解唔到啫。聰明仔女都係出少句聲，一陣畀人當「異端」，畀「異端審判者」捉第一次就打鑊甘，捉第二次死得人。然而，就有一班「異端」不停研究天象，證明星星太陽月亮唔係圍住地球轉，證明地球有自轉有公轉嘅「地動說」。

靈光一閃 番唔到轉頭

故事分成三個大編章一個小編章，三大編章都係圍繞「異端」vs「異端審判者」。「異端審判者」有權力有武力，仲要好超級敏感嘅惡犬，基本上一畀佢聞到蛛絲馬跡，就滿清十大酷刑侍候。反之「異端」就要喺冇資源，冇資料嘅世界，睇個星星都可以畀人捉嘅環境下，研究一個無人相信嘅學說。每一次睇角色諗計仔瞞天過海，一邊研究，一邊要燒晒啲研究廢事畀人周到正，好似睇緊「無間道」 咁劇力萬鈞，真係睇到拍晒手掌。

可能大家會覺得好戇居，就算真係證明咗「地動說」，聽日咪都係繼續番工。故事中「異端審判者」都有幫觀眾問各位「異端」：

異端審判者話：「明明比機會你放棄研究就無事，做咩要咁硬頸？」
異端：「我唔放棄，對『地動說』證明更有利。你嘅敵人唔係我，唔係『異端』，係人嘅好奇心，係『知性』。」

合理 唔一定優美 錯誤 都唔一定亳無意義

角色們都做自以為「合理」嘅事；「異端審判者」覺得「異端」影響社會安寧，死咗都合理；有人為咗錢；有人為咗生存；有人為升官；都有人為報復……

為咗唔劇透太多我舉第一個主角做例，天才學生拉斐爾信念係做「合理」嘅人，講好聽嘅說話，做神嘅孩子，12歲就升讀大學。但當佢接觸「地動說」後，睇世界嘅方式唔同咗，睇到更多行星萬物規律，漫畫中用「星空」做引子，相信「地動說」嘅人，睇到每一粒星啲軌跡，咁嘅星空係令人「感動」。正正係被「感動」，番唔到轉頭。（通俗講，當大家知道KFC logo係一個火柴人手腳加肯德基叔叔嘅大頭，大家都番唔到轉頭，忘不了啦。） 因為「感動」，佢選擇唔去做大家眼中嘅「合理」事，而係主動去理解世界真理。儘管人人話佢錯，甚至作為現代人嘅我哋都知佢嘅「地動說」係有錯。但係錯，都唔代表亳無意義，特別喺科學，錯都係一個證明，一個理論嘅實踐。

集文學/美學/哲學之大成

原文名字中「チ」（chi），而日文中地殼嘅「地」、血液嘅「血」同知識嘅「知」都係發「チ」音。日文嘅一字多意令佢喺文學上多咗一份調味，濃淡剛好又不至於味精般俗氣。而作為科學漫畫，當中理論解釋唔會將漫畫分鏡變成小說。而係分開編章慢慢解釋，係一個淺白嘅科學證明題。而作者魚豊老師係讀哲學出身，作品加入唔少對應情節嘅哲學名句，例如某人死前（注，都幾多人死下）引用蘇格拉底名言「沒有人嘗試過死亡的滋味，人卻都將其視為最大的惡。」深入淺出對白與證明，更令本作意思入木三分。

本作平衡深度娛樂，更出色嘅係每一個角色都有合理動機，亦有發揮空間。十個角色有十個「合理」，繼而引發衝突，無一個人完全對錯，表面上「異端審判者」係奸角，但從佢哋角度出發，又合情合理。所以我反而覺得劇中反派係「世界」，或者稱為「神」。

因為三大編章後，有一個平衡世界，係可以討論「地動說」嘅世界，「知性」一啲嘅世界。好似推翻三大編章嘅故事，但同時有畫龍點睛之妙----「知性」都唔一定啱。更甚者，我哋睇到嘅世界都唔一定正確，保持思考。引用劇中名句：「迷惘之中就一定會有倫理存在。」

本作獲得獎項：

漫畫大獎2021第2位

下一部人氣漫畫大賞2021第10位

《這本漫畫真厲害！2022》男生篇第2位

第26屆手塚治虫文化獎漫畫大獎（同時為該獎最年輕得獎者）