1月号读书报告 刘以鬯《酒徒》

「一月一书」，系我2024年嘅其中一个目标。虽自中学毕业后养成阅读习惯，睇咗好多书，但今年想有突破。虽然读书并非武功，唔系唯快不破，但为自己定一个目标都唔系坏事。

 

（中小学时期有读书报告，唔睇书嘅我试过交食谱，好似系有关芝士蛋糕做法，结果被人笑到面黄）正如爱因斯坦名言”If you can't explain it simply, you don't understand it well enough”，阅读最忌为读而读，我目标系可以从书中学习并加以表达。因此为咗方便纪录哩个习惯，试下做读书报告。而2024第一本，当然系回归香港文学，就讲一本关于文学嘅香港文学，刘以鬯著作《酒徒》。

 

先介绍下作者刘以鬯。我问我爸我妈（佢哋都曾经睇书，果一代人流行睇武侠小说），佢哋竟然唔识刘以鬯。刘以鬯出身于1918年，系香港著名作家，以出人意表嘅创意见称，都有人称其作为意识流小说，著名导演王家卫更表明「2046」同「花样年华」嘅故事正正系启发自刘以鬯小说，「2046」中嘅「所有的记忆都是潮湿的」就系出自刘以鬯手笔。

 

一个有才华嘅男人，却无人欣赏，所以无钱，继而自我怀疑，自甘堕落，最后日日夜夜饮酒。就系酒徒嘅故事。故事讲述第一人称主角老刘，本身对文学创作有热诚，都有经验同知识，但要喺香港写「庸俗」嘅武侠小说为生。更因为生计比朋友呃去写剧本，最后被朋友偷稿，一分钱都攞唔到。最后更要写「情色文学」先可以赚到钱，书中描述十分到位：

 

「一个文艺爱好者忽然放弃了严肃的文艺工作去撰写黄色文字，等于一个良家妇女忽然背弃道德观念到外边去做了一件不可告人的事情。」

 

书中仲有好多女性角色喺老刘身边周旋，一个堕过胎17岁少女，因追求刺激引诱老刘令佢要搬走；一个老公长期不在家嘅包租婆想喺老刘身上寻温暖不成自杀；一个家境贫穷到要做舞女嘅红颜知己；一个当老刘系死去儿子嘅老婆婆……但不论有多少人关心，几多酒精下肚，老刘都系唔快乐，因为现实令佢唔快乐。佢喜爱嘅文学喺香港被认定一文不值，如果海明威喺香港写出「老人与海」都唔会出版成功。 老刘喺香港不能做自己喜爱嘅文艺工作，所以终日沉迷酒精，好似一种帮人逃离不理想嘅现实嘅药，不论系良药定毒药，都要钱。为咗生理同心理需要，老刘都系要写自己讨厌嘅文字，一层一层愈踩愈深，万刧不复。

 

其实唔只香港，放眼世界，文字/电影/艺术都系同钱有关。书中明指一个爱尔兰作家乔也斯，生前作品被人偷印、误解；死后被人称为20世纪最伟大作家之一；艺术界有以梵高为首，死后先成名嘅艺术家。现实系灰暗嘅，无娱乐性嘅作品唔会比人睇上眼，作者死亡新闻反而会成功话题。愈上心愈心累。今时武侠小说已经唔起流行，但今日嘅英雄电影难道唔系武侠小说2.0咩？书中老刘嘅武侠小说被报社拒绝续稿，原因系故事人物嘅动作唔够多，因为当时最受欢迎嘅小说都系多动作嘅。如果将「动作」一词代入成「CG」，观感就fit晒。酒徒出版于1962年，但当中对娱乐嘅批判、对品味嘅追求、对文学嘅看法，到2024年嘅今日都唔落后。可能有生之年，严肃嘅文字/电影/艺术会消失殆尽，文艺爱好者只会更无力，或者好似老刘咁成为酒徒，因为我哋根本冇同现实斗争嘅力量。

 

 

最后以MastaMic嘅「流行无罪」作结：

地下上唔到大场面 

嚟自地下嘅永远只可以企场边 

望住台上面　七情上面嘅表演

我问音乐系咪就系咁表面

 

（千几字写一本长编小说读后感真系唔易，又唔太想写太长，唯有只讲一两个点，欢迎大家比意见，希望今年真系出到12编。）