記-原神之旅-2

唔知你哋對呢間公司有咩印象，我估都係做出原神嘅公司，至此而終，但我覺得佢哋係堅值得尊敬嘅公司，而非至此。

係大陸手遊兩巨頭，騰訊同網易稱霸嘅「抄襲」時代，手機遊戲界就真係得怪彈同神魔一眾大熱嘅「外國勢力」稱得上可以玩。當然，佢哋係唔錯，幾符合當時嘅需求。但崩壞3rd出現於大眾視野時，真係準備變天啦。

其實崩壞3rd並非米哈遊嘅首作，而係當時類flash(眼淚嘅7k7k同4399)嘅崩壞學園。我冇玩過，但可以話係帶嚟米哈遊嘅第一批粉絲同收入嘅出道作。發家後，向同世界觀崩壞系列發展，而第三作即崩3就令佢哋儲齊技術向原神發展。

我知道，原神畫面唔算精緻，老頭環好佢多多聲，但奇妙在佢免費同時係二次元同類遊戲中，人物郁得最自然。而公測初期一大堆風波排山倒海咁嚟，抄襲，私隱同政治都有。但歷時過兩年嘅製作都成功帶起熱潮，甚至冇炎上，原神都冇咁紅。

第一次行係咁有代入感嘅山谷，符合想像嘅蒙德城，見到特瓦林嘅設計，其實已經有迷上咗佢。而隨Lv提升，主線任務中完成一切後嘅嗰句，「被自由之神命令嘅自由，是否真正嘅自由？」第一次令我對佢嘅劇情產生興趣，甚至回味至今亦仍有回甘。

而面對住原神嘅大陸雙巨頭，仍至全世界都開始做更多開放世界，但我認為係手機平台之上，無一敵手。而我認為原神帶出更重要嘅意義，係將「用心做遊戲，質量自會帶嚟錢同口碑」嘅道理擺返係一眾廠商嘅面前。(塞爾達同原神係堅有分別，只係部分界面同常設視覺特效會相似)

而米哈遊亦冇攬住原神過成世，唔止對崩壞呢個起家世界拓展落去，更再開新嘅《絕區：零》去努力實現宅男拯救世界嘅願望。好過王者一直賣皮膚，其他繼續抄襲嘅騰訊。

最後，我都想推坑大家接觸下原神。係蒙德嘅自由氣息，璃月擁有嘅獨有文化認同，鶴觀及稻妻歷史帶出嘅無力感，都好值得大家去接觸，更唔好話跟住嘅智慧國度須彌，絕對公平嘅楓丹，戰鬥主義納塔同至冬呢嗰愚者之國，有嘅故事點都只會帶出更多味道，更加耐人尋味。

write in 29/5/2022