淺談「光B現象」

溫馨提示：以下文章以粵語表達，對文筆有要求既讀者可以轉睇其他文章，謝謝。

「條廢老係度阻Q住曬。」

「推光B上去。」

「咁既歌詞攪到成個樂壇cheap曬。」

「乜王生玩咁大，俾人鬧自己公司係仆街都得。」

  最近某大電台投票競逐最受歡迎男歌手，做成全城熱話，光B既冒起，帶俾香港人另類茶餘飯後話題。今日就嘗試探討呢個係香港不時會出現既有趣現象。

一如過往，我並唔會對此現象的來龍去脈講一片，只集中討論出現此現象，所帶出既社會「狀況」。

通常出現這類「狀況」，大多是兩班不同網民，帶住各自支持既意識形態同主張互相對抗，如果要打個比喻，就好似三國時期，劉備同曹操兩大陣型玩PVP。而其中有趣既係，意識形態會出現互相併殺同吞併，支持同敵對者有時會不斷轉換陣型，當然，會有一班人抱住「食花生」既心態隔山觀虎鬥。最後既結局就係唔會有最後結局，除非引發意識形態既颱風眼消失，如果唔係呢場對抗永遠只會持續落去。

但係乜野原因，令人類樂此不疲咁玩呢個遊戲呢？定只係一種單純既娛樂？定有其他更深一層既原因，個人認為值得探討落去。

首先如果讀者唔清楚意識形態係乜，嘗試概括各家說法既共通點係：想像、期望、價值既統合概念，唔需要有任何現實根據，但你可以清晰感覺到，係一份追求同遠景，所以意識形態深受政治家既喜愛。

人類與生俱來對遠景充滿渴求，因為遠景代表對未來一份連繫：人與人之間既連繫。已經有唔少科普研究證實我哋嘅大腦非常之渴求社交，長期社交孤立甚至會對大腦構成負面影響，所以話人類與生俱來就需要彼此之間聯繫也不為過，利用意識形態作為工具正係人與人之間互相連繫既一種重要方式，所以我地鐘意聽八卦，鐘意講是非。

而意識既特性係彼此共融，但同時又可以彼此對立。唔明？舉個簡單例子，你可以鍾意一個人嘅一個優點，但同時亦都可以因為呢個優點而討厭佢。而亦就係因為呢個特性，所以人類嘅意識形態其實係不斷咁轉換，亦同時反映咗人與人既關係其實好脆弱，因為好少既問題就可以對一個人嘅觀感產生變化。

而套用落「光B現象」就係大眾對現今樂壇既質疑，亦可以話係老一輩人對現今世代年輕人既一種意識形態既宣戰，但呢場挑機，最後勝利者會係光B，定係……就讓我哋拭目以待。