何必

以前我阿爷时常同我讲：佢话做人就要好似阿驼行路-- 舂舂（中中） 哋就好喇！万事唔好太积极亦唔可以太马虎。呢句说话就变成我嘅做人嘅指南针啦。我学问唔高，写中文信稍为可以，读同写英文就麻麻地啰。

讲普通话勉强，广东话是我母语，用英语沟通，啲鬼佬都听唔多明，我𠮶啲 “企厘卡拉” 嘅华语点出大场面吖！马来话噏几句仲得：马根，文那，阿巴猫。。。

高职位嘅工作我担当唔起。小职位我又唔愿意。做生意又冇胆。噉做个行街嘅sales系最啱我㗎啦！讲啲咸水英文就吓吓阿婆同啲马来阿伯。我啲客家华语就最洒家。马来话一句 “巴故士”就走天涯。

钟sir又得，舂sir又好都系一句啫。中中哋呢种人系社会揾食都系靠撞彩㗎！啦，主席梗系唔轮到我做但系充生晒做个“煮食”都可以嘅。一样啫：主席就佢讲大家听。我呢就我煮，大家食。

人哋有料到嘅就事事带头做领队。我呢个惊青嘅小人物，船头惊鬼，船尾又惊贼，一定唔敢包尾啦。所以次次都夹系中间。先出就先死，包尾就冇运行；夹系中间系最好彩！

有人嘈交，打交，我一定先走就先着。要做架梁嘅，要做英雄嘅𠮶个就肯定唔会系我钟sir喇。有人话，噉做人埋好 衰仔。
哎！做人可必要事事要强出头呢？谦虚啲，缓和啲，低调啲啲。万事要达到一半合格就好啦！主席唔就做就煮吓食，唔系英雄就快快乐乐做狗熊。人一世物一世，吓，过得骨就算啦！

祝大家快快乐乐做个普通人。