何必

以前我阿爺時常同我講：佢話做人就要好似阿駝行路-- 舂舂（中中） 哋就好喇！萬事唔好太積極亦唔可以太馬虎。呢句說話就變成我嘅做人嘅指南針啦。我學問唔高，寫中文信稍為可以，讀同寫英文就麻麻地囉。

講普通話勉強，廣東話是我母語，用英語溝通，啲鬼佬都聽唔多明，我嗰啲 “企厘卡拉” 嘅華語點出大場面吖！馬來話噏幾句仲得：馬根，文那，阿巴貓。。。

高職位嘅工作我擔當唔起。小職位我又唔願意。做生意又冇膽。噉做個行街嘅sales係最啱我㗎啦！講啲鹹水英文就嚇吓阿婆同啲馬來阿伯。我啲客家華語就最灑家。馬來話一句 “巴故士”就走天涯。

鍾sir又得，舂sir又好都係一句啫。中中哋呢種人係社會搵食都係靠撞彩㗎！啦，主席梗係唔輪到我做但係充生曬做個“煮食”都可以嘅。一樣啫：主席就佢講大家聽。我呢就我煮，大家食。

人哋有料到嘅就事事帶頭做領隊。我呢個驚青嘅小人物，船頭驚鬼，船尾又驚賊，一定唔敢包尾啦。所以次次都夾係中間。先出就先死，包尾就冇運行；夾係中間係最好彩！

有人嘈交，打交，我一定先走就先着。要做架樑嘅，要做英雄嘅嗰個就肯定唔會係我鍾sir喇。有人話，噉做人埋好 衰仔。
哎！做人可必要事事要强出頭呢？謙虛啲，緩和啲，低調啲啲。萬事要達到一半合格就好啦！主席唔就做就煮吓食，唔係英雄就快快樂樂做狗熊。人一世物一世，吓，過得骨就算啦！

祝大家快快樂樂做個普通人。