紧张？焦虑？关关难过关关过！文凭试（DSE）放榜实用小贴士！

辛辛苦苦挨过文凭试（DSE），轻松左一排，话咁快又到一众莘莘学子放榜季节，笔者距离放榜原来已经五年，谂返起当年第一年考范文，都算系摸住石头过河，作为过来人，都想同大家分享下当年嘅经验。

真系「一试定生死」？

相信唔少人都视放榜为人生一个好大嘅关口，特别喺香港，由细到大我地都比人灌输「读好书、揾好工＝成功人生」嘅方程，临近放榜先开始有啲心理辅导机构或者大专学校卖下广告话你知人生有其他出路，放榜成绩失利并非末日，虽然系事实，但霎时间就要人改变比人洗脑十几年嘅谂法，相信无咩人接受到。

读大学/大专到底系咩一回事？

放榜成绩合符预期固然可喜可贺，但如果成绩未如理想，只是心仪学系的「掷界位」，心情不免忐忑。如果你考入该学系嘅意志十分坚定，呢个时候通常可以选择Retake或者由大专考上大学，另一方面，有啲人会选择退而求其次，拣另一收分较低嘅学科，务求拎到一个大学学位。先讲前者，其实喺中学毕业嘅时候就揾到一个清晰嘅方向系一件好叻同好幸福嘅事，有啲人可能出左嚟做野五至十年先一路行一路摸索到，所以就算成绩未达标，千祈唔好比呢个挫折打击你嘅决心。笔者入到大学之后，遇到唔少人都系大专升上嚟，Year 3 嘅时候我就遇返一个同届中学同学，原来佢喺大专升返上大学，最后我地都一齐喺同一个大学Program 毕业，所以「条条大路通罗马」系真嘅。

 「入左大学先算」嘅选择比较适合未清楚方向嘅学子，喺读书嘅过程中大家或多或少都会知道自己嘅长处、短处或兴趣所在，就算未清楚自己想读咩科，建议大家尽量根据返兴趣同能力拣，唔好为左入大学拣一个同自己长处或兴趣相差太远嘅学科。因为入大学读书其实系更加专门咁样去钻研一门学问，学科嘅难度会提高，亦都唔再好似中小学咁由老师手把手教学，逐样逐样话你知要做咩同点样做，需要自己主动提问、安排学习时间、选择钻研到几深入，如果无咩天份，而热情又搭够唔到，会好辛苦，或者越读越颓。

咁点样可以尽量喺有限嘅选择度拣到较为适合自己嘅科呢？首先，要睇真啲你拣左咩，虽然唔同嘅院校加加埋埋有咁多课程，睇课程名都睇到头晕眼花，但唔好放弃，千祈唔好「是但、求其、差唔多」，有啲课程个名同内容可能会「货不对办」，要金睛火眼睇清楚自己拣左咩，先按兴趣、能力同成绩收窄范围到十至十二个课程，喺呢个范围内记住唔好净系睇课程名称 ，要仔细睇埋个课程实际上会上咩堂，例如个课程名叫「中国语言及文学」，可以再㩒入去睇课程表，就会见到「香港文学」、「音韵学」等课程名，睇下合唔合符期望，如果你发现文言文要读好多，但其实你想学嘅系现代文学创作，就可以再揾下有无其他更专门嘅课程。另外，可以问下身边有无人识人读𠮶科，例如学校师兄师姐，同学呀哥家姐，由读紧嘅人讲你知课程内容就最实际。

「放长线钓大鱼」

再嚟就讲下啲老土野，虽然话就话「办法总比困难多」，但唔少同学仔最大嘅心理关口可能系同辈压力，每每到左派成绩嘅时候，我地都不免会同人比较，「平时校内我考得咁好，老师家长对我期望咁高，考衰左实令佢地好失望。」、「佢读得咁hea 点解都高分过我。」、「要读多两件年大专先升上大学好似差过啲直升嘅人，会唔会比人鄙视？」。环境使然，我地都会成日同身边人比较，但入到大学同进入社会之后，如果继续用中小学嘅心态同眼界去同人比，会过得非常痛苦。所谓「人比人，比死人」，之后你就会发现唔同人嘅家庭社经背景、经历、机遇嘅差距远到无法比较，甚至系你无法想像。情况比如捉飞行棋，有啲人开局可能就泊左两架机喺终点，有啲人掷极都掷唔到六起机，最后辛辛苦苦行近终点，又可能一野比人打回头，不过有时行中同色格仔又有得跳几格㖞，讲到尾，唔好同人比，捉好自己人生盘棋就够。当我地将眼前嘅困难放得无限大，我地嘅焦虑都会变得无限大，DSE 只系其中一个里程碑，要记住以后仲有好长嘅路，可以比大家慢慢揾慢慢试，跌下撞下兜多两圈，其实无咩大不了。