緊張？焦慮？關關難過關關過！文憑試（DSE）放榜實用小貼士！

辛辛苦苦捱過文憑試（DSE），輕鬆左一排，話咁快又到一眾莘莘學子放榜季節，筆者距離放榜原來已經五年，諗返起當年第一年考範文，都算係摸住石頭過河，作為過來人，都想同大家分享下當年嘅經驗。

真係「一試定生死」？

相信唔少人都視放榜為人生一個好大嘅關口，特別喺香港，由細到大我地都比人灌輸「讀好書、搵好工＝成功人生」嘅方程，臨近放榜先開始有啲心理輔導機構或者大專學校賣下廣告話你知人生有其他出路，放榜成績失利並非末日，雖然係事實，但霎時間就要人改變比人洗腦十幾年嘅諗法，相信無咩人接受到。

讀大學/大專到底係咩一回事？

放榜成績合符預期固然可喜可賀，但如果成績未如理想，只是心儀學系的「擲界位」，心情不免忐忑。如果你考入該學系嘅意志十分堅定，呢個時候通常可以選擇Retake或者由大專考上大學，另一方面，有啲人會選擇退而求其次，揀另一收分較低嘅學科，務求拎到一個大學學位。先講前者，其實喺中學畢業嘅時候就搵到一個清晰嘅方向係一件好叻同好幸福嘅事，有啲人可能出左嚟做野五至十年先一路行一路摸索到，所以就算成績未達標，千祈唔好比呢個挫折打擊你嘅決心。筆者入到大學之後，遇到唔少人都係大專升上嚟，Year 3 嘅時候我就遇返一個同屆中學同學，原來佢喺大專升返上大學，最後我地都一齊喺同一個大學Program 畢業，所以「條條大路通羅馬」係真嘅。

 「入左大學先算」嘅選擇比較適合未清楚方向嘅學子，喺讀書嘅過程中大家或多或少都會知道自己嘅長處、短處或興趣所在，就算未清楚自己想讀咩科，建議大家儘量根據返興趣同能力揀，唔好為左入大學揀一個同自己長處或興趣相差太遠嘅學科。因為入大學讀書其實係更加專門咁樣去鑽研一門學問，學科嘅難度會提高，亦都唔再好似中小學咁由老師手把手教學，逐樣逐樣話你知要做咩同點樣做，需要自己主動提問、安排學習時間、選擇鑽研到幾深入，如果無咩天份，而熱情又搭夠唔到，會好辛苦，或者越讀越頹。

咁點樣可以儘量喺有限嘅選擇度揀到較為適合自己嘅科呢？首先，要睇真啲你揀左咩，雖然唔同嘅院校加加埋埋有咁多課程，睇課程名都睇到頭暈眼花，但唔好放棄，千祈唔好「是但、求其、差唔多」，有啲課程個名同內容可能會「貨不對辦」，要金睛火眼睇清楚自己揀左咩，先按興趣、能力同成績收窄範圍到十至十二個課程，喺呢個範圍內記住唔好淨係睇課程名稱 ，要仔細睇埋個課程實際上會上咩堂，例如個課程名叫「中國語言及文學」，可以再㩒入去睇課程表，就會見到「香港文學」、「音韻學」等課程名，睇下合唔合符期望，如果你發現文言文要讀好多，但其實你想學嘅係現代文學創作，就可以再搵下有無其他更專門嘅課程。另外，可以問下身邊有無人識人讀嗰科，例如學校師兄師姐，同學呀哥家姐，由讀緊嘅人講你知課程內容就最實際。

「放長線釣大魚」

再嚟就講下啲老土野，雖然話就話「辦法總比困難多」，但唔少同學仔最大嘅心理關口可能係同輩壓力，每每到左派成績嘅時候，我地都不免會同人比較，「平時校內我考得咁好，老師家長對我期望咁高，考衰左實令佢地好失望。」、「佢讀得咁hea 點解都高分過我。」、「要讀多兩件年大專先升上大學好似差過啲直升嘅人，會唔會比人鄙視？」。環境使然，我地都會成日同身邊人比較，但入到大學同進入社會之後，如果繼續用中小學嘅心態同眼界去同人比，會過得非常痛苦。所謂「人比人，比死人」，之後你就會發現唔同人嘅家庭社經背景、經歷、機遇嘅差距遠到無法比較，甚至係你無法想像。情況比如捉飛行棋，有啲人開局可能就泊左兩架機喺終點，有啲人擲極都擲唔到六起機，最後辛辛苦苦行近終點，又可能一野比人打回頭，不過有時行中同色格仔又有得跳幾格喎，講到尾，唔好同人比，捉好自己人生盤棋就夠。當我地將眼前嘅困難放得無限大，我地嘅焦慮都會變得無限大，DSE 只係其中一個里程碑，要記住以後仲有好長嘅路，可以比大家慢慢搵慢慢試，跌下撞下兜多兩圈，其實無咩大不了。