風風雨雨 平安是福

【風風雨雨，平安是福】

【自救救人之道】

【你都可以行俠仗義】

【你擁有的聲波武器】

【哨子小故事】

【新增奇離個案】

（上完堂，請看看置後的短片TVB特輯「東張西望」）

欠缺實體防衛技術訓練者，真係講都好無謂。平時只能醒目的，行街時唔好沉迷於手機，多留意附近有冇一的神色異常的奇離怪人物，能避則避為上！

若不幸真係遇事時，千萬唔好天真到質問對方點解？點解？？？（傻架！白撞架！點會解俾你聽呀！自己都變成傻仔呀！附近行人見到，以為你地只係爭執講數呀！冇人會幫拖呀！）。

自保自救或救人之道：第一秒鐘勁聲呼叫「救命呀！火燭呀！救命呀！火燭呀！救命呀！火燭呀！救命呀！火燭呀！」，就有機會有人埋黎睇埋黎幫拖呀！至少可以吸引一大棚人群圍觀及拍片，就變相成為你的貼身保衛團隊及證人呀！陣勢你贏硬呀！奇離怪見人多勢眾，點敢郁手郁腳呀！

勿以為上述防衛心理技術人人可輕易做得到，很多人覺得唔好意思隨便叫救命呀！但可自我訓練直至熟習並可隨時叫得出為止。訓練場所可以選擇在無人海邊、山頭等…（我曾經教過幾個輕度「自閉」的SEN學生做角色扮演，一人手持道具膠刀作狀兇人，對手則扮演被兇者，一路退後，一路大叫「救命呀！救命呀！」。結果？教足二堂，仍未符理想呀！請問問閣下，曾經遇過這樣的老師教練，或受過這樣的訓練嗎？）。

以下僅供有武術經驗的讀者參考。未經實體訓練者絕不宜隨便動手幫拖。

劇情如下：受害人被行兇者一手（左手）按倒在地面，另一手（右手）持利刀向受害人斬或插。救人者只須出其不意，用左手快速抓實兇徒持刀的右手手腕，另一手（右手）同時包實其掌背並發勁內屈+扭轉，摺其腕關節，刀尖就反向指向兇徒，身形同步逆時鐘方向（俯瞰）旋轉，就即把兇徒扳倒在地。兇徒會因手腕關節勁痛及刀尖指向自己而鬆手，就可奪去其利刀（第一時間解除最高風險，隨後的鎖控技術及其他人士的協助就較易處理啦！…）。上述一二三個動作先後幾乎同時進行（一二秒內搞掂搞定，避免任何持續纏鬥或拉扯！…）。再三提示，未經訓練，絕不宜動手，風險很大，切記！

問題分析：若身旁剛好有張圓凳或掃把等物件，可用作武器嗎？答案不能一概而論，須先判斷你的目的為何？若被兇徒持刀追斬，或可使用，但能逃則逃，走為上著。其餘待執法人員處理好了。切勿參與對打一番呀！若見兇徒按人於地，持刀正在或意圖斬人，用圓凳或掃把等物，必不能一下子打暈兇徒（切勿盲信電影情節），反而可能激起兇徒轉而追斬救人者，或對受害人更加狠勁插多幾刀呀！明白嗎？

祝大家出入平安！五月三十五日。

＋

＋ ＋ ＋ ＋ ＋

若未親身練習過基本實況攻防自衛術人士（互相對打對拆訓練），不宜輕易誤信自己真有能力反擊（電視劇虛構情節之動作不宜胡亂模仿！）。有些影片示範自衛術的片段看來似乎有效？若果雙臂被捉壓禁住，就更易反制反擊啦！但對一些平時連普通運動也懶得做的人士，只是看熟影片有關動作，臨場就能發揮？可能性幾乎等於零呀！武術邏輯：攻防動作是一種身體接觸時對雙方「力量」、「技術」及「平衡」的敏銳感覺訓練，未經過真正實習，很難有這種感覺，更不可能運用得宜。

我「測試」過一些練習「太極」多年的朋友，用雙手正面捉住對方雙手，問如何輕鬆解脫呢？（預設條件：(1)不准起腳／起膝踢撞；(2)不准頭撞；(3)不准牙咬；(4)不准吐口水；(5)不准滾地；(6)不准摔撻（柔道摔技）；(7)不准抱身；(8)不准用任何方法攻擊對方）。

結果？就像一般人一樣，不知如何是好啦！

＋

＋ ＋ ＋ ＋ ＋

另分享一個小故事，親身目睹的事件：

話說很多年前，我在九龍佐敦道親眼見過一單奇離鬧劇，一名男子被一名不認識的女子當街捉住雙手，無法脫身，又不敢攻擊女子，結果擾攘一番，引來途人圍觀，直至警察來解圍。原來附近店舖很多人都知此女子有精神問題！

故事詳情：在人來人往的佐敦道大街中，有一個男人被一個女人用手捉實雙手拉扯，女人疑似胡言亂語，大叫揾你好耐啦！你唔好走呀！男人無法脫身，顯得十分之狼狽及不知所措，既不敢（當然係不宜啦）用暴力解決，又唔好意思大叫救命，只能不停大聲講，我唔識你呀！係咪認錯人呀？！其他路人在圍觀。此時路邊一個報紙攤販老闆大聲講，呢個女人黐線㗎！先生你唔係第一個啦！（我當時幾乎笑出眼淚！）... 。

請問：若果你係當時嗰個男人？你會怎麼辦呢？下一次若有緣見面，我可免費傳授一個輕鬆瀟灑的脫身技術，又不會傷害對方絲毫。歡迎大隻佬手瓜起𦟌之士挑戰。無須想得太複雜，要使出什麼太極壓掌呀，什麼武當纏絲手呀等等高超武功（可能傷到對方的手腕）...。

＋

＋ ＋ ＋ ＋ ＋

「碰瓷黨」、「撞人黨屈錢黨」入侵本地？網民聲稱遭母子屈賠錢 (XX日報)

有人咁講「比我打到佢仆街！如果佢叫個仔撞我 我會補多一腳！」，講下好啦！如真係咁做，就中計啦！（佢想你咁做呀！）最後結果？打賊者會被落案控告傷人罪！其實賊佬賊婆就係想搵一個藉口屈人一筆錢。預設劇本，目的係想激怒受害人行使暴力反擊，打佢一下，佢就自行故意跌低，跟著指控受害人推佢落地受傷！然後同受害人糾纏講數索賠錢……。係「撞車黨」屈人賠錢手法的另一版本。

切勿因一時衝動而中計呀！點做至好？吹雞啦！大聲叫救命啦！扮演發癲啦！大叫有人打劫呀！火燭呀！大家拍片呀！大叫9-9-9呀！總之，動口不動手！

＋

＋ ＋ ＋ ＋ ＋

同賊講數，乃下下之策！明解嗎？唔明？香港人太善良太鵪鶉啦！宜看看以下一些小故事：

＞＞＞引述某受害人所講「擄子佬、擄子婆」（在香港某商場2015-3-9）＜＜＜

＞＞＞＞＞

我視線離開個仔大約只係十到十五秒……

其實點解我會懷疑佢係擄子佬、擄子婆呢？因為當我發現阿仔背影，我即刻飛跑出去(邊跑邊叫我仔個名)，其後我仔停低回頭望，但嗰個靚妹仲猛拉扯我仔向前行！跟著我即刻捉實我仔，再捉住個靚妹，我問我仔，做乜冇問過媽媽走咗去？媽媽叫你，你做乜仲行？

我再問個靚妹，問佢做乜夾硬拖我個仔走？(我當然表情係十分兇惡！)但個靚妹驚都吾驚吓…完…全吾答我。我就當佢吾識聽廣東話，但(同佢一黨嗰個女人，只係望住，冇過嚟鬧番我！)

＜＜＜＜＜

＞＞＞遲知總好過無知＜＜＜

(1) 受害人之即時反應仍有極大改良空間。嚴格點要求來說，可能犯了防衛技術上之基本錯誤！

(2) 即時與賊「講數」、「質問」．．．乃下下之策！受害人問賊：「做乜夾硬拖我個仔走？」，若我係賊，我內心會咁答：「你傻下傻下，我係賊，梗係意圖拐帶啦！我既不是議員，又不是你老公，也不是你的學生．．．，我有何充分理由回答你的查詢呀？問我點解？你唔覺得自己大傻過大傻咩？我係賊呀！若我開口回答，我是否大傻中之更大傻呀？！」。

(3) 受害人問仔：「做乜冇問過媽媽走咗去？媽媽叫你，你做乜仲行？」，更犯了問錯對象（小朋友是受害人之一）！好多人平常喜歡質詢小朋友或家人，未完全了解發生什麼事之前，就開口埋口問「點解？點解？．．．」（其實會令家人抗拒或討厭！），不知不覺，長久壞習慣就養成了自然的口頭禪。危急關頭時，就只能使用出唯一誤以為有效的武器「點解？」。

(4) 理性做法僅供參考：危急情況之下，直接「攻擊」，出其不意，攻其不備，乃上策！若受害人未接受過基本防衛武術訓練，當然切忌隨便行使武力啦！所說「攻擊」，不必定要使用身手或實物來進行，有沒有聽過一種高科技武器「聲波大炮」？若我是受害人，同樣情況下，我會如此做：扮作普通行人，靜靜地（如貓步）急追移前（最好勿被賊察覺），貼近小朋友時，出其不意一手捉實小朋友，同時運用自己天賦的「聲炮」，發出最高分貝的聲音，不停地大呼：「救命呀！捉賊呀！救命呀！捉賊呀！．．．」。效果？（一）賊會即時鬆手／逃跑；（二）會有途人圍觀拍片代報警；（三）會有街坊義士出手擒賊；（四）警察會好快到。

勿以為事不關己，就可己不勞心。讓賊人遁去，將會有另一個受害人，下一位受害人也可能是你的親友！

＋

＋ ＋ ＋ ＋ ＋

＞＞＞參考資料＜＜＜

街頭「自衛術」無難度！宜用智力避免暴力。買一個勁聲哨子做你的私人隨身安全「護衛」吧 (Be on your guard)。如何運用？請参考《哨子小故事》。

若未親身練習過基本實況攻防自衛術人士（不論男女），若持有攻擊性武器，包括「防狼噴霧器」，切勿輕易誤信自己真有能力反擊（電視劇虛構情節之動作不宜胡亂模仿！），你的「武器」隨時被奪，變成敵人更狠傷害你的武器！

 

那麼，有什麼自衛好建議呢？(1)請先看看我的一個「哨子小故事」，望你有所啟發；(2)參加一些實況攻防自衛術課程（並非要短期內成為武術高手，而係「武裝」自己的智能和脫險求救的技巧）。

【哨子小故事】

我平時隨身帶備一只勁聲哨子（體育老師常用那種），掛在鎖匙扣，我曾經適當地運用這小「武器」及心理自衛戰術來介入，即場制止或化解了一些突發性的公眾地方衝突事件。其中一次發生在羅湖站（邊境口岸）上層出入口，可能因人多擁擠而引起輕微碰撞，導致三名大漢（其中一名之手臂有紋身圖案）大爆粗話，喊打喊殺，意圖追打一名男子，我立即在人群中大吹一聲哨子，結果？當場鴉雀無聲！衝突及潛在的暴力即場終止，人群繼續安心前行，好像沒事發生一樣。何解？惡人不是直接被哨子聲浪嚇倒，而是因恐怕引來警察（或正義群眾力量）呀！

事件本來都與我無關，我只是路見不平，拔哨相助而已！何解我選用哨子？理由很簡單：(1)平靚正輕；(2)不須用電，不須維修；(3)就手就口；(4)絕對合法的自衛「武器」；(5)對惡行情緒（或暴力）可即時降溫；(6)輕易引起群眾或警衛注意可能有危險；(7)危急情況可救己助人；．．．。

請緊記，雖非執法人員，我們也可理直氣壯地「行俠仗義」，但言行不宜越線，不宜粗鄙，也須審時度勢，知所進退。理想自衛術：能避則避，走為上著（避險／求救）；不戰而能息之為次；戰而勝之為下矣！（不得不戰？）。

＋

＋ ＋ ＋ ＋ ＋

東張西望｜網傳兩段街頭MMA片段，有買菜男在元朗某街市與女菜販爭執，竟遭「偷桃」？｜民生｜TVBUSA (2023-6-8) 5:37min

https://www.facebook.com/watch?v=275965988293987

檔主十分之冷靜！（時間地點不明）

https://www.facebook.com/reel/640680794310876

Good day good luck and good health! 2023