强迫思维与灾难想法之「无限轮回蛙」
强迫思维与灾难想法之「无限轮回蛙」
天气凉爽，直觉猫同歪理狗去左山野散步。行咗半个钟，忽然响路边发现有一只处境特别嘅青蛙。呢只青蛙脚下有一段回旋路，条路上面有1至8嘅数字。青蛙会由1顺时针行到去8，8接驳住1，跟住佢又重新12345678咁样行（明明我已昨夜无间踏着面前路……)。直觉猫同歪理狗望住只青蛙行左无数咁多转，睇到都眼花花。
终于，青蛙响百忙之中，发现左佢地嘅存在。佢「哇」一声，然后叫「help！」原来，呢只无限轮回蛙并唔想咁样不断转圈，只系佢冇办法停落嚟。佢话自己一直有强迫思维，一啲好细嘅事都可以引起佢嘅不安，令佢往唔好嘅方向FF落去，于是从第一个念头，好自然去咗第二个念头，第三个、第四个，一直落去。
好喇，到佢谂到最尾，得出灾难想法，亦即最坏结果（第八个念头），应该可以完？
但系，第八个念头之后，佢又会自动波去返第一个念头，想验证一下自己谂嘅嘢系咪正确。然后，就系无限个然后。不断loop，停唔到（可唔可以比我唞吓🥲？）
无限轮回蛙：「calling calling，求救！到底点先可以走出呢个怪圈？」
直觉猫：「表面上，不断loop，似乎系想证明个灾难想法系啱，以确认自己冇希望。
掉转嚟睇，可以话其实你想证明个灾难想法系错，灾难唔会发生。两者其实有相同重点，重点在于 “确定带来安心”。
无论系确定灾难必然来临，抑或确定自己安全，两者都系因为确定，所以安心。
但因为你唔确定你幻想中嘅事系咪会发生，所以冇办法安心。无论点loop，你都无办法确定。幻想中嘅事，无论机率几细，去到0.000001%，的确有可能发生，就好似美国有人可以一个礼拜内连续中两次头奖彩票。」
无限轮回蛙：「好似明多左。我系一个几无安全感嘅人。我谂起我每次感到不安时，都系用咗同一个唔work 嘅模式去尝试处理我嘅恐惧。呢个模式只系表面，我特别缺乏安全感先系重点。」
直觉猫：「你讲得啱，系”特别缺乏安全感”呢粒种子响泥土下发芽，于是地面出现强迫思维同灾难想法呢啲花叶。」
无限轮回蛙：「嗯嗯。解决粒种子，就可以解决佢嘅衍生物。咁点先可以更有安全感呀？」
直觉猫：「面对未知，恐惧系好正常嘅。但我哋都可以从另外嘅角度出发，例如，对某啲人黎讲，未知可以系机会。
好似03年楼市狂跌，对好多人嚟讲系可怕嘅嘢，怕之后跌得更厉害。但有啲人却睇到机会，入市，购买后等升值。
无论表面睇落是福是祸，情况都有可能系相反嘅。细个屋企好富贵，呢样睇落系好好嘅嘢，却令A君培养出娇生惯养嘅性格，待人处事出现问题而浑然不知。细个𠮶阵，B君只顾玩自己钟意玩嘅，读唔到书，日日俾老师闹，睇落冇前途；最后，佢出嚟社会做事，处事果断，终于做咗大老板。所以，而家睇落系点样嘅状况，真系好重要？真系需要大量时间大喜大悲？
不论目前睇落是福是祸，不论脑海同你讲咩要世界末日嘅说话，你都能「喔👌🏻」。更平常心咁看待各种状况，就更能安于当下、活在当下。你会慢慢唔试图排斥「觉得可怕讨厌嘅状况」。
无限轮回蛙听后一跳，忽然跳出左轮回路，到达大路。直觉猫和歪理狗讶异于无限轮回蛙强大嘅弹跳力，暗自称奇。蛙蛙回首向直觉猫一笑，鞠躬感谢佢嘅帮忙，就继续往前跳跃，离开左两人嘅视线范围。
目送完蛙蛙，直觉猫觉得有啲唔妥，问歪理狗，「我系咪唔记得咗啲乜嘢？」
歪理狗回答，「系呀，你唔记得左问client收钱啊。」
直觉猫立即倒地翻滚，为自己飞走嘅猫粮伤感咗1秒。
———
舍言阁 ChatHouse
IG: www.instagram.com/chathouse2046
FB: www.facebook.com/chathouse2046
⭐️ 欢迎追踪/ 点赞/ 留言/分享
🍵 舍言服务，助你摆脱不合时宜的信念或价值观，重新定位，踏上新旅程
️👉🏻 WhatsApp查询：6017 1095