強迫思維與災難想法之⁣「無限輪迴蛙⁣」

強迫思維與災難想法之⁣「無限輪迴蛙⁣」
⁣
天氣涼爽，直覺貓同歪理狗去左山野散步。行咗半個鐘，忽然響路邊發現有一隻處境特別嘅青蛙。呢隻青蛙腳下有一段迴旋路，條路上面有1至8嘅數字。青蛙會由1順時針行到去8，8接駁住1，跟住佢又重新12345678咁樣行（明明我已昨夜無間踏着面前路……)。直覺貓同歪理狗望住隻青蛙行左無數咁多轉，睇到都眼花花。⁣
⁣
終於，青蛙響百忙之中，發現左佢地嘅存在。佢「哇」一聲，然後叫「help！」原來，呢隻無限輪迴蛙並唔想咁樣不斷轉圈，只係佢冇辦法停落嚟。佢話自己一直有強迫思維，一啲好細嘅事都可以引起佢嘅不安，令佢往唔好嘅方向FF落去，於是從第一個念頭，好自然去咗第二個念頭，第三個、第四個，一直落去。⁣
⁣
好喇，到佢諗到最尾，得出災難想法，亦即最壞結果（第八個念頭），應該可以完？⁣
⁣
但係，第八個念頭之後，佢又會自動波去返第一個念頭，想驗證一下自己諗嘅嘢係咪正確。然後，就係無限個然後。不斷loop，停唔到（可唔可以比我唞吓🥲？）⁣
⁣
無限輪迴蛙：「calling calling，求救！到底點先可以走出呢個怪圈？」⁣
⁣
直覺貓：「表面上，不斷loop，似乎係想證明個災難想法係啱，以確認自己冇希望。⁣
⁣
掉轉嚟睇，可以話其實你想證明個災難想法係錯，災難唔會發生。兩者其實有相同重點，重點在於 “確定帶來安心”。⁣
⁣
無論係確定災難必然來臨，抑或確定自己安全，兩者都係因為確定，所以安心。⁣
⁣
但因為你唔確定你幻想中嘅事係咪會發生，所以冇辦法安心。無論點loop，你都無辦法確定。幻想中嘅事，無論機率幾細，去到0.000001%，的確有可能發生，就好似美國有人可以一個禮拜內連續中兩次頭獎彩票。」⁣
⁣
無限輪迴蛙：「好似明多左。我係一個幾無安全感嘅人。我諗起我每次感到不安時，都係用咗同一個唔work 嘅模式去嘗試處理我嘅恐懼。呢個模式只係表面，我特別缺乏安全感先係重點。」⁣
⁣
直覺貓：「你講得啱，係”特別缺乏安全感”呢粒種子響泥土下發芽，於是地面出現強迫思維同災難想法呢啲花葉。」⁣
⁣
無限輪迴蛙：「嗯嗯。解決粒種子，就可以解決佢嘅衍生物。咁點先可以更有安全感呀？」⁣
⁣
直覺貓：「面對未知，恐懼係好正常嘅。但我哋都可以從另外嘅角度出發，例如，對某啲人黎講，未知可以係機會。⁣
⁣
好似03年樓市狂跌，對好多人嚟講係可怕嘅嘢，怕之後跌得更厲害。但有啲人卻睇到機會，入市，購買後等升值。⁣
⁣
無論表面睇落是福是禍，情況都有可能係相反嘅。細個屋企好富貴，呢樣睇落係好好嘅嘢，卻令A君培養出嬌生慣養嘅性格，待人處事出現問題而渾然不知。細個嗰陣，B君只顧玩自己鍾意玩嘅，讀唔到書，日日俾老師鬧，睇落冇前途；最後，佢出嚟社會做事，處事果斷，終於做咗大老闆。所以，而家睇落係點樣嘅狀況，真係好重要？真係需要大量時間大喜大悲？⁣
⁣
不論目前睇落是福是禍，不論腦海同你講咩要世界末日嘅說話，你都能「喔👌🏻」。更平常心咁看待各種狀況，就更能安於當下、活在當下。你會慢慢唔試圖排斥「覺得可怕討厭嘅狀況」。⁣
⁣
無限輪迴蛙聽後一跳，忽然跳出左輪迴路，到達大路。直覺貓和歪理狗訝異於無限輪迴蛙強大嘅彈跳力，暗自稱奇。蛙蛙回首向直覺貓一笑，鞠躬感謝佢嘅幫忙，就繼續往前跳躍，離開左兩人嘅視線範圍。⁣
⁣
目送完蛙蛙，直覺貓覺得有啲唔妥，問歪理狗，「我係咪唔記得咗啲乜嘢？」⁣
⁣
歪理狗回答，「係呀，你唔記得左問client收錢啊。」⁣
⁣
直覺貓立即倒地翻滾，為自己飛走嘅貓糧傷感咗1秒。⁣
⁣
———⁣⁣⁣
捨言閣 ChatHouse⁣
⁣
⁣IG: www.instagram.com/chathouse2046 
FB: www.facebook.com/chathouse2046 
⭐️ 歡迎追蹤/ 點讚/ 留言/分享⁣⁣⁣
🍵 捨言服務，助你擺脫不合時宜的信念或價值觀，重新定位，踏上新旅程⁣⁣⁣
️👉🏻 WhatsApp查詢：6017 1095⁣⁣⁣