【 1月6号系Boxing day？ | 文化差异—圣诞篇】

之前就讲过对西班牙人嚟讲，送礼物嘅象征人物系「东方三贤」，又称「三皇」。今日就讲下属于佢哋嘅节日 —「三皇节」。

「三皇节」其实就类似我哋所熟悉嘅boxing day，但系同传统嘅Boxing Day唔同，西班牙人拆礼物嘅日子唔系12月26号而系1月6号，而送礼物嘅角色正正就系三皇（当然实际上就系家中长辈负责送礼物俾后辈或者小朋友）。至于我哋所熟悉嘅圣诞老人，喺西班牙就被称为Papá Noel，系一个重要性相对低啲嘅圣诞角色。

咁呢一日究竟有几紧要？佢除咗系全国嘅公众假期，亦都标志住圣诞正式完结、新一年即将开始。传统上，一家大细会喺呢一日聚首一堂，一齐食一款名为”Roscón de reyes”嘅甜品。简单嚟讲，佢就系一款巨大化嘅环状忌廉槟，特别之处在于佢嘅馅当中会收埋两个惊喜：一粒豆同一个国王嘅模型仔。如果你食𠮶嚿蛋糕入边发现到粒豆，你就要负责俾成份甜品嘅钱；但如果你发现到嘅系国王模型， 咁你就可以戴上随蛋糕附送嘅纸皇冠👑，加冕成为国王，象征住来年会好运嘅意思～