【西班牙嘅圣诞节究竟有几特别？| 文化差异—圣诞篇🎄】

全世界嘅圣诞节都一样㗎啦～
如果你咁谂，咁就大错特错喇！西班牙嘅圣诞节唔只得12月24-26号，送礼物嘅象征人物都唔系圣诞老人，想知点解？就睇落去啦！

♦️ 西班牙冇圣诞老人？

喺香港，我哋对「圣诞老人」嘅印象不外乎就系个留住白色胡须、著住红色衫、夜晚会骑鹿车周围送礼物俾细路仔嘅老人家。不过你又知唔知，原来对西班牙人嚟讲，负责送礼物比小朋友嘅并唔系我哋所熟悉嘅圣诞老人，而系「东方三贤」。

「东方三贤」系三位喺耶稣出世嘅时候由东方嚟朝拜嘅贤士，佢哋每人都带咗一份礼物献比耶稣。西班牙因此以东方三贤象征圣诞送礼物嘅角色。

呢三位贤士分别系Melchor, Gaspar 同埋Baltasar，虽然后人冇详细记载佢哋嘅身份，但系普遍都认为佢哋系精通天文学嘅智者。随时代推移，三贤士嘅形象喺西班牙已经演变为三国王，并且被描述为嚟自唔同种族：Melchor为白人，嚟自欧洲大陆；Gaspar为黄种人，嚟自亚洲；Baltasar为黑人，嚟自非洲。

♦️ 西班牙嘅圣诞节系22号开始？

冇错，有别于香港，22号喺香港系冬至，但西班牙就已经正式开始咗圣诞节喇，因为呢日系一年一度「肥仔」彩票开锣嘅日子！

「肥仔」彩票，即系西班牙圣诞彩票，系由西班牙文名 “El Gordo” 直译而嚟，系西班牙全年奖金最高嘅彩票，头奖系40万欧罗，因此系所有西班牙人都非常期待嘅日子，唔少人都会凑埋一家大细去买几张搏下运气。由于呢日嘅重要性好高，所以普遍都被默认为圣诞嘅开始。

除咗奖金「肥美」，佢公布结果嘅分式都为人津津乐道，因为佢唔只系得部搅珠机咁简单，而系由细路仔将数字唱出嚟嘅，相传呢项传统已经有200年历史㗎喇，至今仍然沿用紧。

♦️24号晚圣诞大餐

12月嘅24、25号对西班牙人嚟讲，系同屋企人共聚天伦嘅日子，佢哋最重要嘅环节就系同屋企人一齐食晚饭喇。由于好多出咗埠嘅仔女都系每逢圣诞先返老家探屋企人，唔少屋企都会煮定两至三日嘅圣诞大餐去庆祝。讲紧嘅系24号晚食剩嘅隔夜饭𩠌，佢哋可能要食埋25、26号嘅午餐同晚餐先清得晒，可想而知佢哋24号煮嘅份量究竟有几夸张！

至于会食啲咩，当然就充满仪式感啦：首先唔少得两三碟家常前菜，例如圣诞鸡汤、芝士配西班牙火腿等；然后会有主菜，佢哋最经典嘅圣诞主菜一定系烤羊腿！配埋焗薯就系完美嘅主菜喇；食到咁上下当然唔少得一两杯酒啦，喺圣诞节呢个咁重要嘅节日，佢哋通常会小酌几杯红酒白酒或者香槟，加添几分仪式感；最后佢哋仲有个专属平安夜嘅甜品，名为tronco de navidad，即系圣诞树干蛋糕，简单嚟讲就系放满圣诞装饰嘅瑞士卷。另外，仲会有唔同硬度同口味嘅鸟结糖，都系每家每户必备嘅甜品嚟㗎！