【瞓晏觉系国粹｜文化差异 —作息篇】

喺香港，食完嘢昏昏欲睡嘅状态叫做「饭气攻心」，而香港人对抗「饭气」嘅方法通常就系饮奶茶咖啡，务求唔会做做下嘢恰眼瞓。但系，西班牙人就啱啱相反，既来之，则「瞓」之，佢哋平日晏昼系有一段瞓晏觉时间嘅，对于有得瞓晏觉呢样嘢亦都感到好自豪。

呢个晏觉时段通常处于2pm-5pm之间，正如之前营业时间篇所讲，唔少店舖喺呢段时间期间系会闩门嘅，打工仔逢亲食完晏都会小休一阵、瞓阵晏觉，长短不拘，到5点再返去开工。至于点解会有呢个文化，有人话系为咗避开夏天最热嘅时段，亦都有人话系源自西班牙内战后嘅时期，好多人为咗赚钱而打两份工，一份早更一份夜更，所以就想尽量攞两份工中间嘅时间嚟休息，随后逐渐形成呢个晏觉文化。

边个说法属实就不得而知，净系知西班牙人至今仍然推崇瞓晏觉嘅习惯，对佢哋嚟讲，瞓晏觉可以纾缓压力，又令个人精神啲，系件百利而无一害嘅事。