【东主有喜 放假一天｜文化差异 — 商店篇】

♦️营业时间篇

你有冇试过想买嘢但系食闭门羹？喺香港呢个情况未必好普遍，多数铺头都早开晏收，甚至开足24/7嘅都大有人在，最多系遇著「东主有喜 放假一天」先可能撞一两次板。但系，嚟到西班牙就唔同讲法喇，如果你带住得闲落街买吓嘢嘅谂法嚟，你会有9成9机会系买唔到嘢㗎！

点解？因为西班牙嘅铺头系「间歇性开放」嘅，意思系佢哋铺头开到晏昼嘅时候，会放几个钟饭，期间闩一闩铺，食完之后再开返。正如之前饮食篇所提及，西班牙人食晏时间系由2pm到5pm嘅，呢个食饭时间适用于顾客，都适用于多数老细同打工仔。所以如果你谂住食完饭去买吓嘢行吓街，通常都会撞板，因为店主都好可能仲叹紧佢杯咖啡。至于5pm后开唔开返、又或者开到几点，就因「店」而异喇～

「咁礼拜六日去买实冇死啦挂」，如果你咁谂就唔好意思喇，都系唔啱嘅，因为你放假，佢哋都会放！礼拜六嘅舖头通常最多开到晏昼两点，打后就闩门㗎喇，换句话说即系开半日；礼拜日就9成铺头都闩晒门添，因为佢哋好重视休息，通常礼拜日所有人都唔会返工做嘢嘅。

所以结论系，喺西班牙买嘢一定要check铺头嘅营业时间，最稳阵就系礼拜一至六嘅晏昼2pm前，如果唔系就要等多3个钟、又或者等第二日㗎喇～

⛑：上述资料有可能唔适用于大型连锁店或较商业化嘅地区