【你食咗饭未呀？｜文化差异 —饮食篇】

打亲招呼，香港人都惯咗问句「你食咗饭未呀？」一餐饭除咗用嚟填肚，更加系大家叙旧倾计嘅场合。不过如果攞呢个问题问西班牙人嘅话，99%都肯定会话「未！边会咁早食吖？」

     冇错，西班牙人绝对系全世界最迟食饭嘅民族！简单嚟讲，将香港人嘅饭钟褪迟两至三粒钟，就大概系西班牙人嘅食饭时间喇～ 以下我哋就详细啲比较吓西班牙人同香港人嘅三餐有咩分别啦！

♦早餐篇
     对于要翻工翻学嘅人，平时大概都系7-8am食早餐，当然西班牙嘅打工仔都唔例外，但系有趣嘅位在于，佢哋系会食第二餐早餐㗎，即系我哋平时讲嘅”brunch” ！点解会咁？系因为唔少公司都会喺10-11am左右放个break仔，俾佢哋出去饮杯咖啡、食啲小食，所以唔少西班牙人都会有食两次早餐嘅习惯。

     不过，早餐喺西班牙传统并唔系好重要，好多人翻工前只系饮杯咖啡，放break先食两条churros咁，唔志在食多，最紧要够chill，叉够电再翻去做嘢。

♦午餐篇
     论重要性，晏昼饭绝对系西班牙人最重要嘅一餐。即系有几重要？唔讲你都未必知，就算系打工仔都足足有三个钟放晏昼饭时间，食饱瞓个晏觉都仲得添。

     而呢三个钟通常就系指2-5pm，习惯上唔少人都系3pm先会去食嘢，而食亲都大概个半至两粒钟。相信对于由学生时期已经只得一个钟食晏嘅香港人嚟讲，真系充满羡慕妒忌恨。而对西班牙人嚟讲，一餐完满嘅晏昼饭包括前菜、主菜、饮品、甜品同咖啡。食饱就大概4点几5点，要继续翻工嘅就翻工，唔洗嘅就通常翻屋企瞓个晏觉，认真写意～

♦晚餐篇
     聪明嘅你可能已经谂到，晏昼饭都3点先食，咁个晚餐咪临瞓食？！冇错㗎，香港人食晏同食晚饭中间要7-8个钟消化下，西班牙人都唔例外。佢哋基本上夜晚9点打后先开始叫dinner时段，甚至9点半10点先食，都系完全正常嘅。当然啦，由于距离瞓觉时间都好近，佢哋并唔会食好多嘢，可能面包夹芝士同Jamón (西班牙火腿），咁已经系一餐。想尽兴啲嘅，可能夜晚11点仲会出去同friend小酌一杯啤酒、吹下水咁，咁样先叫完整食完佢哋嘅一日「三」餐。