【西游记｜旅游知识篇 】

♦️地理
西班牙（España）位于欧洲嘅西南部嘅伊比利亚半岛，西边毗邻葡萄牙，东北接壤法国，而最南端可以远眺北非嘅摩洛哥，中间相隔住直布罗陀海峡，系连接北大西洋同地中海嘅重要航道。

♦️气候
西班牙南北边各有唔同气候，北边较潮湿，平均气温较低；中部同南边较干噪，气温较高。

夏季嘅北部气温较温和，通常最高温大概30度；但系中部同南部就夸张啲，近年夏季最高温甚至高达50度！

冬季嚟讲，喺最冻嘅12月1月，北边有机会落雪，但系南部就通常唔会。而南部一年四季嘅湿度都非常低，降雨量少，系典型又热又干燥嘅地方。

♦️飞行时间
由亚洲东边嘅香港飞到欧洲西边嘅西班牙，直航需时大概系15hr。但系而家暂时两边系冇直航往返嘅，所以任何航班基本上都至少要转机一次，而需时亦都会去到20hr左右。

♦️ 国旗：「血与金」 🇪🇸
西班牙国旗由红黄红三条横间组成，又被称为「血与金」，背后原因一直都有唔同解读，其中一个就认为红色代表住斗牛士流过嘅血，而黄色就系斗牛场上嘅泥土。同时，国旗偏左边亦都展示咗西班牙嘅国徽，当中包含住历史上构成西班牙嘅王国徽章同埋其他部件，以下就同大家逐一解读：

🔸Reino de León 莱昂王国
代表纹章：狮子像
年代：公元10-14世纪
地区：现今西班牙西北部

🔸Reino de Castilla 卡斯提亚王国
代表纹章：金城堡
年代：公元9–18世纪
地区：现今西班牙北部，后与阿拉贡王国合并成西班牙

🔸Reino de Navarra 纳瓦拉王国
代表纹章：金锁链
年代：公元9–17世纪
地区：现今西班牙东北部

🔸Reino de Granada 格拉纳达王国
代表纹章：石榴花
年代：公元13–15世纪
地区：现今西班牙南部

🔸Corona de Aragón 阿拉贡王国
代表纹章：垂直红黄条纹
年代：公元11–18世纪
地区：现今西班牙东北部，后与卡斯提亚王国合并成西班牙

🔹百合花
中心位置嘅百合花系波旁王朝嘅象征，亦即系现今嘅西班牙王室，源于法国嘅波旁家族由18世纪起断断续续咁统治西班牙

🔹西班牙皇冠
顶部皇冠象征国家权力，实物喺马德里皇宫

🔹海格力斯之柱
南方直布罗陀嘅古老名称，两条白色柱上缠绕住红色丝带，上面写有拉丁文”Plus Ultra　“字样，意思为「通向更远方」，象征哥伦布发现新大陆一事。

【名胜古迹 】

♦️西班牙出名啲乜？
如果由一个西班牙人答你嘅话，佢会话除咗国技斗牛，仲有南方嘅flamenco舞蹈；食物嚟讲又有号称「猪肉界天花板」嘅西班牙黑毛猪，与之齐名嘅仲有榄榄油同红酒；名人艺术家仲有毕加索、达利、高弟…

总之西班牙出名嘅嘢实在太多啦，坐落西班牙各处嘅名胜古迹更加系多到你数唔晒！
如果你观察够入微，你会发觉上面嘅手绘图其实画咗好多西班牙出名嘅建筑，例如位于首都马德里嘅欧洲门 （Puerta de Europa ）、塞哥维亚嘅古罗马水道桥（Acueducto de Segovia）、巴塞隆拿嘅圣家大教堂（Sagrada Família）、仲有连韩剧都攞嚟做题材嘅阿尔罕布拉宫（Alhambra）等等…
唔讲你都未必知原来成个西班牙一共有49项世界遗产，仅次意大利同中国，西班牙系全世界头三位拥有最多世界遗产嘅国家！

喺呢一个历史文化底蕴咁深厚嘅国家其实真系有好多鲜为(香港)人知嘅事与物可以分享，如果你都有兴趣知多啲就记住继续留意我哋嘅专页啦，更多更深入同埋有趣嘅资讯陆续有嚟！