【西遊記｜旅遊知識篇 】

♦️地理
西班牙（España）位於歐洲嘅西南部嘅伊比利亞半島，西邊毗鄰葡萄牙，東北接壤法國，而最南端可以遠眺北非嘅摩洛哥，中間相隔住直布羅陀海峽，係連接北大西洋同地中海嘅重要航道。

♦️氣候
西班牙南北邊各有唔同氣候，北邊較潮濕，平均氣溫較低；中部同南邊較乾噪，氣溫較高。

夏季嘅北部氣溫較溫和，通常最高溫大概30度；但係中部同南部就誇張啲，近年夏季最高溫甚至高達50度！

冬季嚟講，喺最凍嘅12月1月，北邊有機會落雪，但係南部就通常唔會。而南部一年四季嘅濕度都非常低，降雨量少，係典型又熱又乾燥嘅地方。

♦️飛行時間
由亞洲東邊嘅香港飛到歐洲西邊嘅西班牙，直航需時大概係15hr。但係而家暫時兩邊係冇直航往返嘅，所以任何航班基本上都至少要轉機一次，而需時亦都會去到20hr左右。

♦️ 國旗：「血與金」 🇪🇸
西班牙國旗由紅黃紅三條橫間組成，又被稱為「血與金」，背後原因一直都有唔同解讀，其中一個就認為紅色代表住鬥牛士流過嘅血，而黃色就係鬥牛場上嘅泥土。同時，國旗偏左邊亦都展示咗西班牙嘅國徽，當中包含住歷史上構成西班牙嘅王國徽章同埋其他部件，以下就同大家逐一解讀：

🔸Reino de León 萊昂王國
代表紋章：獅子像
年代：公元10-14世紀
地區：現今西班牙西北部

🔸Reino de Castilla 卡斯提亞王國
代表紋章：金城堡
年代：公元9–18世紀
地區：現今西班牙北部，後與阿拉貢王國合併成西班牙

🔸Reino de Navarra 納瓦拉王國
代表紋章：金鎖鏈
年代：公元9–17世紀
地區：現今西班牙東北部

🔸Reino de Granada 格拉納達王國
代表紋章：石榴花
年代：公元13–15世紀
地區：現今西班牙南部

🔸Corona de Aragón 阿拉貢王國
代表紋章：垂直紅黃條紋
年代：公元11–18世紀
地區：現今西班牙東北部，後與卡斯提亞王國合併成西班牙

🔹百合花
中心位置嘅百合花係波旁王朝嘅象徵，亦即係現今嘅西班牙王室，源於法國嘅波旁家族由18世紀起斷斷續續咁統治西班牙

🔹西班牙皇冠
頂部皇冠象徵國家權力，實物喺馬德里皇宮

🔹海格力斯之柱
南方直布羅陀嘅古老名稱，兩條白色柱上纏繞住紅色絲帶，上面寫有拉丁文”Plus Ultra　“字樣，意思為「通向更遠方」，象徵哥倫布發現新大陸一事。

【名勝古蹟 】

♦️西班牙出名啲乜？
如果由一個西班牙人答你嘅話，佢會話除咗國技鬥牛，仲有南方嘅flamenco舞蹈；食物嚟講又有號稱「豬肉界天花板」嘅西班牙黑毛豬，與之齊名嘅仲有欖欖油同紅酒；名人藝術家仲有畢加索、達利、高弟…

總之西班牙出名嘅嘢實在太多啦，坐落西班牙各處嘅名勝古蹟更加係多到你數唔晒！
如果你觀察夠入微，你會發覺上面嘅手繪圖其實畫咗好多西班牙出名嘅建築，例如位於首都馬德里嘅歐洲門 （Puerta de Europa ）、塞哥維亞嘅古羅馬水道橋（Acueducto de Segovia）、巴塞隆拿嘅聖家大教堂（Sagrada Família）、仲有連韓劇都攞嚟做題材嘅阿爾罕布拉宮（Alhambra）等等…
唔講你都未必知原來成個西班牙一共有49項世界遺產，僅次意大利同中國，西班牙係全世界頭三位擁有最多世界遺產嘅國家！

喺呢一個歷史文化底蘊咁深厚嘅國家其實真係有好多鮮為(香港)人知嘅事與物可以分享，如果你都有興趣知多啲就記住繼續留意我哋嘅專頁啦，更多更深入同埋有趣嘅資訊陸續有嚟！