大爱东南亚 // 白须旗舰店

话说上星期又放连假，本身打算五一假去行个靓山，点知睇天气预报见到会大风大雨（事实都真系），所以改早咗一日去行🤣 唔行唔知身体差，想当年K小姐都行得小快，而家到人哋要等返我转头🥲真系要认真做返运动了！

好！水就吹完喇！讲返啲嘢食先！
一落山同行朋友就问我食咩好，我二话不说就拖住佢狗冲去白须💨 事关K小姐醉嗳东南亚菜，所以白须真系正合我意❤️

牛骨汤饭嚟讲呢，大大碗一定够食！大约有五六旧大牛骨，仲有四五块颇厚嘅牛腩，肥瘦适中！食肉之余仲可以损埋啲骨，吸埋入面嘅精华！店家仲提供埋自家制大埔椒辣椒油，可以点牛腩食，顿时会有种食紧潮洲粉面嘅感觉！汤底清清地，唔算太浓。不过净饮的话唔会觉得口渴，真材实料！

白须烤牛丸嚟讲呢，令我有惊喜㖞！一上枱，一食，哗，超热！学朋友话斋口腔三级烧伤😂证明真系即叫即烤，好够热度🔥牛丸系一口Size，但我刻意咬开中间望望，见到入面系一丝丝嘅牛肉，香而松软！外层有BBQ汁，已经有足够甜味，建议唔使点辣酱，直接食都已经好好食✨

之前试过晚市坐楼上仲会播戏的，环境不错，期望下次再食的话可以坐下楼上梳化位，同埋甜品🍮下次入西贡，记住狗冲去白须喇😘

忠告：
肥是要减的，动是要运的，嘢是要食的！
有好嘢食，记住话我知😘

时：瞓得两个钟后去行太墩之后
地：西贡湾景街9号地舖白须旗舰店 @baksohk
食：牛骨汤饭👍🏻、印尼鸡汤粉、烤猪颈肉、白须烤牛丸