男人玩嘢

女人會話男人唔夠浪漫，其實話得無錯。男人嘅浪漫，窮得只有信仰和偏執，於現實與幻想間藕斷絲連。

男人嘅浪漫，源自小玩意，係對細節某一元素嘅執念。飲咖啡，由exprssso 可以飲到single origin。玩hifi，換條線，旁人聽不出分別，卻執於相信新插頭同埋鍍銀線路正在起作用，仲同你講：正打算換埋加強版電容器。

川保久齡，為時裝定下線新定義條，固然係潮流icon，但山本耀司 同 Issey Miyake就會 玩埋剪裁同布料之間嘅空間感，深究沈迷於某一substance, fabric 中。

女仔固然有注重細節者，但通常會注重最終效果為前提，佢掛住唇膏嘅顏色分別，因為深淺差兩度就同修容粉唔夾。但係對男人嚟講，結果未必係最大考量，有時會求過癮與使用中嘅satisfaction 。

林公子跑完倫敦馬拉松，買俾自己嘅手信，係個鐵鉛筆刨。係份小玩意：朝早做完《晴朗》，畫完Facebook 小插圖，刨顏色筆，都刨得滿足啲。

植村秀 主張 臉即畫布；妝容即藝術，著重工具，尤甚於畫家重視畫筆，某程度就係脫離咗呢份現實感。一諗起Shu Uemura 會諗起 工具控，《穿Prada的惡夢》亦只會提起shu uemura嘅睫毛夾。此公80年代設計眉筆，唔單只著重筆芯formula, 仲諗埋個筆頭形狀，最終成品，原來係naginata， 日本刀。

講到浪漫，女生會幻想塗上唇膏，靈魂飛脫軀體，化身公主；而身旁嘅男人呢，於現實中又游離在一己空間：思考緊點用小配件，為Walkman 帶來一番小昇華；

又或者，覺得用日本刀型嘅眉筆

著實別緻。到頭來，浪漫唔係幻想，而係自我陶醉。

迷人小小玩意，竟可化成大志。

認清男人嘅玩嘢浪漫，就發覺自己不再是少年。少年，我已經不太年輕了。