交換衣服攻略

減少消費：交換衣服

我以前買衫，諗到有咩方法唔洗用咁多錢，之後我諗可以以物易物，或者用少少錢換衫。我好耐前已經咁做，同人交換衫著，但係件衫要乾淨，我先會交換，換返嚟之後會洗一次之後先用。我同人地聯絡，收集左好多衫，原來好多人有衫唔要，有啲買返嚟著左一兩次就無著。所以我已經好少買衫，而且夠衫著。（面衫、外套同埋褲。）

好多香港人怕著二手衫，聽到都會抗拒，其實無咩問題。可以試下，咁樣又唔洗曬左件衫，又唔洗用到好多錢。

交換衫有兩種方法，第一個方法係聯絡左對方，用Whatsapp影低你想交換既衫，對方同意後，之後就去人地屋企度，或任何約定地方收集。

第二個方法係用一蚊同人地交換一件衫。好多人都願意俾，都係聯絡好對方之後，就去人地屋企或任何約定地方，咁人地就會預備好想交換既衫。到時你可以慢慢同佢傾，你可以揀你鐘意既衫，唔一定要拎晒人地交換既衫。我有時候因爲咁樣而識到好多朋友，你地都可以試下。

你地可能諗到安全問題，去人屋企會唔會有事？我盡量都會同對方傾左計先，好多時有師奶或者後生女聯絡我，咁耐以嚟都係安全既，你可以約係大街大巷交收，或者人地屋企樓下，咁樣係有人既地方，你可以確保你既安全。就算去人地屋企都唔洗擔心，因為大家為左交換衫，交收完就走，都唔會有咩事。我就係因為咁樣去過好多唔同既屋企，三千尺豪宅、公屋、居屋、湯房都見過，識到好多人，佢地好熱心，多年都會聯絡你叫你去交換衫。除了衫都可以換其他飾物、擺設等等，都係交換或者用低價去換，咁大家都有得著。

一方面唔會曬左啲衫，另一方面又幫到人慳位，呢個做法其實唔錯，所以我係度同大家推介呢個方法。

有時候收到唔想要既衫可以直接同對方講，唔洗驚會影響到人，對方會另外自己再處理啲衫，大家有傾有講，仲會繼續聯絡。你可以招募啲你想要既款式或者年齡層既衫，例如後生女潮流服飾，就會有師奶聯絡你，佢地收到會同個女一齊執衫，之後等你嚟到就會有得揀衫，最好同對方傾下計，咁對方下次都會肯同你交換衫。

講明要新淨，太舊就唔好收，衛生問題，通常普通人都會保存得幾好，呢樣要睇清楚先好收。

任何地方都有好衫，唔好太懷疑人地啲衫。

有時有人會俾內衣你，我通常唔要，但如果係全新既同埋你好鐘意，你都可以照要。

有時啲人會講價講多幾蚊，你都可以應成，唔好太執著果幾蚊令大家唔開心。

我試過有啲人會逐樣逐樣慢慢講件衫特別或者鐘意既地方，俾耐性慢慢聽，大家都係交流，理解物件對果個人既意義都唔錯。