【求職陷阱】求職搵工需留神，金融地產要小心

臨近暑假，好多學生同應屆畢業生都開始搵工，大家一開始搵嘅工不外乎餐廳侍應、接待員、售貨員、派傳單同倉務員等等，而地產同金融方面嘅工作比一般工作較為吸引，因為有得抽佣，人工可以話係多勞多得，所以每年都吸引唔少人入行。不過，學生同應屆畢業生去做嘅話隨時有機會觸犯法例。

地產方面，而加部份地產公司已經開始請人，見習營業員、暑期銷售助理、見習物業顧問、地產代理、地產從業員、客戶助理都可以係求職網站搵到，不謀而合嘅係，地產公司都表示呢啲職位無須工作經驗，歡迎學生同應屆畢業生，有各種津貼同培訓，固定底薪同上限幾萬蚊佣金，甚至有無上限佣金，聲稱「年薪百萬不是夢，已有大量成功個案，一個電話改變未來」。

但根據《地產代理條例》任何人士無牌照而從事地產代理工作，及持牌地產代理僱用無牌人士從事地產代理工作，均屬刑事罪行。最高刑罰是監禁兩年或罰款50萬元。咁即係話，地產代理需要持有有效嘅地產代理或營業員牌照先可以向人介紹物業資料。如果係無牌嘅情況下向人推銷、轉介、介紹同商議物業資料都有機會觸犯法例。

至於金融方面，情況同地產大同小異，理財顧問、強積金顧問、金融見習生、理財服務員、強積金整合員、強積金整合助理、見習金融顧問、見習金融從業員、見習投資顧問亦都可以係求職網站見到，招聘者甚至會係熱門嘅討論區進行招聘，聲稱學歷不拘，無須工作經驗，亦有各種津貼、培訓、佣金，當中嘅可靠程度令人懷疑。

事實上，從事金融行業都需要牌照，根據證監局《證券及期貨條例》，任何人如果從事證券交易、期貨合約交易、槓桿式外匯交易、就證券提供意見、就期貨合約提供意見、就機構融資提供意見、提供自動化交易服務、提供證券保證金融資、提供資產管理、提供信貸評級服務都要先考取相關嘅牌照，除此之外，從事有關強積金嘅工作都需要先通過相關考試，所以求職者如果無牌工作就有機會承擔法律責任。

年輕人初入職場，如果搵到工唔好咁開心簽約住，有咩工作內容、津貼同福利等等唔清楚記得要問返公司，留意自己係自僱人士定僱員，亦都要去勞工處網站睇一睇勞工法例保障自己，如果唔對路就要向勞工處求助，唔好啞忍，拒絕被無良僱主剝削應有權利。

祝大家都可以搵到份荀工！