【求職陷阱經歷 】打字賺錢?在家工作?月入過萬不是夢?

後生仔女搵工途徑多人人都知,勞工處同政府都有講見到「唔洗學歷同經驗,人工高福利多」嘅招聘廣告就要小心係求職陷阱,但係屋企用手機同電腦打字就賺到錢你地又聽過未?

老老實實,係咪呃人我就真係唔知,淨係知道一般要比200蚊左右,我個陣聽到要交錢即閃。而加上IG search兼職就會見到大把打字賺錢嘅招聘信息,我就試過問其中兩個,開頭都話免會費唔洗比錢,要你比錢嘅都係呃人乜乜乜,但到最後搞左一大輪,講黎講去咪又係要我比200蚊,話要做工作證,大家心照啦。

 

詳細講一講我個陣嘅遭遇:

1.上IG,我話有興趣做打字員

2.對方話隨時隨地工作,中意做就做,做幾多賺幾多,一千字兩百蚊,又話佢地同好多大型小說網站同手寫作家長期合作,問你明唔明

3.我ok,對方再講幫手send宣傳信息去10個group就可以入職

4.幫佢地宣傳完就話轉介我去一位「老師」度train,轉用line傾

5.「老師」要我個人信息

6.「老師」話要先交200蚊做工作證,以防打字員走佬同競爭對手搗亂,唔信就刪唔洗多講

 

明晒啦,即刪。我冇實質證據證明佢地係咪呃人,但大陸同台灣已經有唔少呢類騙局,google search都search到。

只能講我遇到呢個團隊好有組織同系統,用一大堆字同轉介令你覺得佢地唔係呃人,佢地仲話大陸、馬來西亞同香港等等地方都有人做緊,講到規模勁大。

最後奉勸各位後生仔女,搵工都係踏踏實實出去搵或者係可靠嘅求職平台搵啦,記得要search下間公司信息睇下信唔信得過啊!

 

作者:阿怡,一個90後嘅冇志青年。

本文為HKESE 自由作家原創編撰,如欲轉載請聯繫我們。

創作者
創辦於2017,HKESE 是新世代求職招聘平台,自由工作人才社群,致力於推動新自由工作模式,滿足新世代的求職徵才需要。
回應
Blogger / 內容創作者 / 作家大招募
投稿刊登你的文章,成為HKESE 平台作家
HKESE 自由作家計劃