鑽石山荷里活廣場Tamago-En $88疏乎厘班戟

琴日去咗鑽石山地鐵站荷里活廣場嘅Tamago-En
喺現場糖食嗌咗$88嘅疏乎厘班戟

首先講吓餐廳嘅環境
餐廳環境寧靜，偶有背景音樂
餐廳嘅地理位置非常之方便，一出鑽石山地鐵站就係荷里活廣場
荷里活廣場再上電梯就係Tamago-En

接住落嚟我會想講一下食物嘅質素
我認為呢一份疏乎厘班戟係物超所值
班戟非常之軟身，而且有非常之濃嘅蛋味
形容一下班戟嘅質感— 
佢中間係含有非常之多空氣
係非常之鬆軟嘅一種班戟
唯一缺點就係食完好似一陣風咁樣
因為佢嘅材料非常之輕身
所以某程度上食完都係唔夠飽嘅
然而我會話佢嘅甜度恰到好處
佢唔係嗰種死甜，而係有蛋味同埋麵粉味糅合埋一齊嘅甜味
每一啖都好似一個新發現，每食一啖都好似升咗上天堂咁樣
但相對嘅缺點就係當食完成份疏乎厘，就好似跌返落凡間咁樣
好似有一個夢醒返咁樣

講完班戟嘅味道，我好想講吓附上嘅雪糕球
附上嘅雪糕球係雲呢拿味
雪糕球嘅雲呢拿味非常之重，但又恰到好處
佢係比較濃嘅雲呢拿味，但又係唔會喧賓奪主取替左個雪糕嘅精髓— 就係佢嘅甜味
同時間甜味亦都唔係死甜嘅
我認為喺雪糕食完之後，千祈唔好嘥剩低溶咗嘅雪糕
可以用疏乎厘班戟沾上嚟食
一齊食嘅效果大概就係— 有牛奶味同埋雲呢拿味嘅疏乎厘班戟
佢同時間仲有班戟嘅蛋味同埋麵粉味
試想像下你嘅口同一時間有咁多味嘅糅合
但同時間任何一種味都唔會喧賓奪主、先聲奪人
相反佢哋都係一個非常之合拍嘅組合
唯一缺點就係雪糕球比較細
食完有種意猶未盡嘅感覺

之後我會想講吓咖啡忌廉嘅味道同埋質感
咖啡忌廉嘅味道係比較濃嘅咖啡味
佢嘅做法係比較意式嗰種
鍾意比較濃咖啡味嘅粉絲就會喜歡
佢嘅質感都係感覺上比較多發打嘅
係一Pat密度比較低嘅忌廉
而忌廉就係呢一個疏乎厘班戟嘅精髓所在
配上忌廉食嘅疏乎厘班戟苦中帶甜
因為忌廉嘅苦味中和左疏乎厘嘅甜味
兩種味道嘅混合又係一個非常之有趣嘅配搭
忌廉嘅苦味係咖啡嘅苦味，所以苦中帶甘
而配上班戟就甘中帶有麵粉嘅甜味

最後我會想形容一下蕨餅
佢嘅蕨餅外面包有黃豆粉，所以帶咗非常之濃嘅黃豆味
但至於內餡我就會認為佢略為普通
同坊間買到嘅蕨餅冇乜分別

臨尾一提我會想講吓等位狀況
喺繁忙時間呢一間舖頭都係大排長龍嘅
基本上要等到佢幫襯都唔係有可能嘅事啦
所以我會建議係非繁忙時間幫襯
又或者早啲去到

總括而言，我都非常之滿意今次嘅體驗 
絕對有下一次再嘗試其他美食嘅空間