【3分钟拣好适合你的Pop-Up类型】

上两篇文章同大家分享过关于市集既事情，其实做Popup短期实体销售渠道又点知得市集一种呢，只系呢2年市集呢个Term实在太Hit，搞到大家一讲起短租个场卖野就会归纳为「市集」，就连好多Online Store都改个名叫自己做「网上市集」，其实咪又系网店。咁究竟有几多类Popup形式，而边一种形式又适合自己呢？今次呢篇文章会同大家详细探讨。

基本上，大路既Popup场地有五类：市集、商场展销、车仔档、散租铺以及会所摊位五大类。下面将会分析每个类型的特性、适合什么行业以及相应的销售策略。

《市集》

市集系近呢2年比较热门的Pop-up选择，原因有好几个：第一，因为租金相对其他选项低 (市价大约400-600/日不等)；第二，因为呢2年大家都出唔到国，变相屈系香港要揾娱乐，市集就顺势而上 (其实疫情前都有市集，不过普及程度无今时今日咁厉害，呢家好似7仔咁几乎每区总有1个市集。

市集的卖点系气氛，一个市集最基本都有20档以上。有些大场例如D2 Place 1期可以去到100档以上。有气氛自然带动到人流，所以市集系5类Pop-up当中算系人流最多的一种。通常市集会提供1枱2椅比档主，普遍市集都会用1.2 X 0.6米标准枱 (有时会有1.5米 / 1.8米枱)。

行市集既客户群一般都系抱住凑热闹心态，好多都未必系Ready Buyer，而且客群普遍以年青人为主。所以一般佢地系市集会使既钱都唔会太多，好多时候都系行过岩Mood同埋价钱无伤大雅先会买。所以价位最好在$200内，如果可以1张$100纸解决到的会更好 (当然如果你产品富有特色，针对特定客户群，咁就可以收贵点)。

做市集张枱摆盘好紧要，最基本要够立体，最好用层架将产品有层次咁叠高。另外，放一些小摆设点缀一下，增加美感吸引客户眼球。事前宣传方面，档主要善用IG作为宣传平台，用限定优惠或者小礼物吸引粉丝到市集，俗语有云: 做生不如做熟，将粉丝由线上引落线下，就算当场无消费，其实都会增进客户对你的忠诚度。

《商场展销》

商场展销系一个历久不衰的形式，基本上由我出世都呢家都有。商场展销通常会以几多粒「骰仔」做单位。一般而言，1粒骰＝0.8米 * 0.8米。通常一个展销位会以2粒骰起跳，常见会租2.5粒-4粒骰，视乎货品数量同大小。商场展销成本算是5类之中最高。首先，每日租金大约1500-2500不等，同埋一般做商场展销最少都要1个星期 (因为商场会要求搞手搭建摊位，所以搞手通常会拉长展销期以摊分撘建成本)，所以做一场租金差唔多要过万。不过商场展销一般成效都不错，大多在商场中庭，人流有一定保证。一般以家庭客为主，通常卖食品、健康产品、家庭用品成效都不错。货品唔需要标榜好平，最重要系性价比高。

《车仔档》

有时间你经过商场街市门口或者电梯口会见到一架展销车仔，呢一类我地俗称叫车仔档。呢类车仔档租金其实同你租展销差唔多，不过时间会比较弹性，好少会迫你租晒成个星期 (因为免却搭建成本)。呢类车仔人流都算多，因为通常系商场内人流转角位。通常会比较适合做服务类推广，例如保险、电讯、信用卡等。不过都会有做零售的车仔档，呢类车仔档相比展销好处，除了时间弹性高之外，可以避免同类产品竞争，因为通常档位会独立一档。

《散租铺》

如果唔钟意系商场摆，另一种选择就系散租铺。呢类铺位通常系场主短租几个月，然后拆租比商户。商户可以轻装上阵，唔需要咁大投资去长租一个铺，可以日计去摆档。呢类散租铺如果位置比较靓平均都要$1500/日以上了。做呢类散租场通常以散货为主要目的 (亦有服务类会用作推广)。目标客户系街坊、师奶婆仔，所以卖既野主要系生活用品而且要标榜够平，薄利多销为主。第五波疫情期间，最多人租呢类散租场卖检测剂，为求尽快散货。

《会所摊位》

呢家好多私人屋苑楼下都会有会所，有时间周末你都会见到有几个摊位系会所推广产品/服务。会所展销主要针对中产客户群，消费力都不错，最好拣一些有20年楼龄以上，因为佢地会较少供数负担。呢类场地成本都唔少，平均都要$1000/日以上，而且人流系5类之中算少。所以做会所场要针对好特定客群，例如铝窗工程、冷气工种呢类成效会几好。第一，佢地服务系入屋。第二，佢地单价较高，基本上做到1-2单都Cover晒租金有突。如果系零售类，一些中高端食品会较适合，例如冻肉、红酒等。会所虽然人唔多，但如果识得打好关系，可能会有意想不到效果。例如，提供职员优惠。你要知道会所职员保安基本上系屋苑KOL，好多时住户都系透过保安讲先知屋苑有咩活动。另外，其实职员有佢地Whatsapp群，如果你产品平靓正既话，其实系会传开去。

不过呢段时间，我个人就唔太建议做会所场。因为疫情关系其实全部会所都封晒。就算之后开返，经过呢2年疫情其实会所好多时都杯弓蛇影，有少少事就会临时封场，好多时都会令商户失预算。

我都知上面一大段字大家会睇得好辛苦。所以下面我整理了一个列表方便大家细阅同分析。如果觉得我写得还可以既，赏个面分享出去。你地既分享同赞好系我继续分享的原动力。