【市集攻略】人流靠搞手，留人靠档口 | 场胜将军

作为市集搞手一段时间的我，不论个场搞得几成功都好，都总会听到有档主发表以下言论：「个场都无人流」、「搞手【零】宣传啰」、「好静啰，都做唔到生意」等等。当然呢番说话佢地唔会系当面同你讲，通常都系事后会记得自己公司名出现系各大社交平台市集交流群内，先知发生咩事。

首先，作为搞手都试过有失手的时候。有些场地真系未必每个搞手都驾驭得到，我地都试过中招，人流试过强差人意。不过我地发觉好多时候，其实系有人流的。我地每次搞市集都会安排Helper妹妹系入口计人流，都可以同大家分享下数据。一般情况，以一个20-30档的市集而言，每小时都有100-200人进入市集。即平均而言，每小时每档都有4-8位客人可以Serve。咁点解会有档主会做唔到生意架呢？问题唔系「人流」而系「留人」。

大学读Marketing个阵学过一个Theory：AIDA。搞手就好似Sales Funnel入面既第一个(A)，我地作用系Awareness引起外界注意进入我地市集。入黎之后，就要谂引起客户兴趣Interest (I) ，继以诱发佢地既欲望Desire (D)，从而促使佢地尽快Take Action (A) 成交。后面既IDA其实就要靠档主既【留人】功力啦。

搞手不是二房东

不时都收到有朋友讲话想做市集搞手，不过我通常都泼佢地冷水。因为搞手唔系一个【二房东】低价租入，高价分拆租出就可以。如果抱住呢个想法，我劝佢都系唔好入行啦。做搞手其实系一个多功能角色，集PR、Marketing、Event Management、心理辅导员同打杂既角色之一。其中一个好关键就系要识得做宣传带人流。

作为搞手通常会系几方面著手去带动人流: 1) 选址、2)主题、3)活动配套、4)线上推广以及5)线下推广。今次篇幅有限就唔讲入面细节，作为档主可以呢5方面去衡量搞手做唔做到野啦。下次预一篇文章详细讲下我地平时搞市集有咩事前准备。

动态留人

搞手为市集带到人流后，接住就系考档主功力点样【留人】。首先，最重要引起兴趣 (I)。呢方面张枱摆盘装饰系好重要，最基本系要够立体，有需要带1-2个层架将货品有层次咁叠高；另外，灯光都非常重要，因为打灯打得够，产品会呈现得更靓。不过有时候场地灯光未必足够，所以稳阵起见要自备射灯。

第二，制造羊群心理。正所谓瘦田无人耕，耕开有人争。只要有人埋枱睇野，自然有人好奇走去睇。尽量将客人留枱时间延长，呢方面档主既亲和力好重要，令客人愿意留低同你倾计。睇野可以几秒就睇完，讲野可以讲一日都讲唔完。另外，可以适当地为自己档【造势】。有时候叫朋友黎探下你，为自己档口创造人气。有几个人围住张枱，其他人见到有人气都会被吸埋去。另外创造互动、小游戏都不失为一个留人好方法，将埋枱既人逗留时间延长。其实，市集系一个眼球既战场，如何将游走既眼球吸到自己档口，就系你【留人】既功力啦。