未来嘅自己，始于《起床后的黄金1小时》
对上一次，你系几时起身瞓过龙，急急脚走去厕所刷牙洗面，换衫出门口返工？
有无黑仔到，出门口忘记带银包或手机系身，要掉转头返去屋企拎返？
朝早逼完巴士地铁、返到公司食面包饮维他奶，系咪你想要嘅生活先？
一起身就咁混乱、焦急同担惊，仲要折磨到几时？
其实，你有冇更好嘅选择，可以一朝头早，
有好心情，慢慢地享受早餐呢？
有自己嘅Me Time呢？
庐主6/2021开始阅读"The 5 AM Club: Own Your Morning. Elevate Your Life"，
10/2021又读咗《起床后的黄金1小时》，
由夜型人转型晨型人，培养日出前半个钟，
就起身、晨跑、行禅、冲凉、诵经、早餐、咖啡、阅读嘅晨间习惯。
短短5个月，庐主实践晨间习惯，觉察有以下3大好处：
1. 重新掌握人生嘅发球权
起床后的黄金1小时，自愿严禁自己碌手机、覆讯息、检查电邮。
不再被动、无意识地盲目接受别人倾倒嘅垃圾资讯，
而系主动、有意识地留时间俾自己，Me Time，优先做自己最钟意做嘅野。
2. 宁静，进入深度专注 (过程)
日山前半个钟起身，个个都仲瞓紧觉，又无人揾你，个一刻超宁静，零干扰！
庐主刷牙洗面后，即刻出外晨跑20分钟。
空气清晰，无车又无人，跑道显得较阔。
最正系睇到天色由暗渐明，影低日出最靓一刻，同朋友分享。
然后睇住日出，慢慢地、静静地步行返屋企，冲凉和诵经。
咁就啱啱好《起床后的黄金1小时》。
冬季日出大约系6:30am,
庐主可以系7am慢慢享用埋早餐及阅读，8am先出门口返工。
夏季日出大约系5:30am,
早餐6:30am食完，仲有1.5钟嘅Me Time，叹咖啡、阅读、创作、计划等等。
3. 超高效输出 (结果)
由起床到出门口返公司，大约有2至3小时嘅Me Time。
每次完成专属嘅晨间仪式：晨跑、行禅、冲凉、诵经、早餐、咖啡、阅读，
都感觉非常充实、满足同开心。
坦白咁讲，唔系每日都咁美好，庐主可以日出前半个钟就起到身。
的确有啲限制性因素，令到晨间计划无法完全执行。
- 前一晚可能要上堂或者同朋友食饭，比平时迟咗上床瞓觉
- 就算平时9:30-10pm瞓著咗，有时深夜被家人或邻居嘈醒，都会影响到竖日睡眠质素
- 如果第二朝落雨、劲冻、空气指数差，庐主都唔会出去晨跑
如果真系出现以上情况，无法早睡早起或者根本瞓得唔好，
庐主心态上又无太过介意，而系「今日唔得，明日继续」咁谂。
系无乜自我责备嘅情况下，由6/2021至11/2021， 虽然断断续续，
但的确培养出及维持咗5个月晨间习惯，享受Me Time，成为Better Me。
另外，只要瞓觉之前，准备咗以下3样事项，晨间仪式会变得更容易展开。
- 预先写低，你明日理想生活嘅行程
- 准备埋，你明日可能要用到嘅野，包括运动衣物、早餐等等
- 临睡前一个钟，关电脑及设手机为飞行模式，准备好上床瞓觉
如果你都想身体健康啲(身)、心情靓啲(受)、思维清晰啲(心)、想法正面啲(法)，
可以真系俾个机会自己，试一试晨型人嘅生活。
Enjoy Me Time, Be Better ME