未來嘅自己，始於《起床後的黃金1小時》
對上一次，你係幾時起身瞓過龍，急急腳走去廁所刷牙洗面，換衫出門口返工？
有無黑仔到，出門口忘記帶銀包或手機係身，要掉轉頭返去屋企拎返？
朝早逼完巴士地鐵、返到公司食麵包飲維他奶，係咪你想要嘅生活先？
一起身就咁混亂、焦急同擔驚，仲要折磨到幾時？
其實，你有冇更好嘅選擇，可以一朝頭早，
有好心情，慢慢地享受早餐呢？
有自己嘅Me Time呢？
廬主6/2021開始閱讀"The 5 AM Club: Own Your Morning. Elevate Your Life"，
10/2021又讀咗《起床後的黃金1小時》，
由夜型人轉型晨型人，培養日出前半個鐘，
就起身、晨跑、行禪、沖涼、誦經、早餐、咖啡、閱讀嘅晨間習慣。
短短5個月，廬主實踐晨間習慣，覺察有以下3大好處：
1. 重新掌握人生嘅發球權
起床後的黃金1小時，自願嚴禁自己碌手機、覆訊息、檢查電郵。
不再被動、無意識地盲目接受別人傾倒嘅垃圾資訊，
而係主動、有意識地留時間俾自己，Me Time，優先做自己最鐘意做嘅野。
2. 寧靜，進入深度專注 (過程)
日山前半個鐘起身，個個都仲瞓緊覺，又無人搵你，個一刻超寧靜，零干擾！
廬主刷牙洗面後，即刻出外晨跑20分鐘。
空氣清晰，無車又無人，跑道顯得較闊。
最正係睇到天色由暗漸明，影低日出最靚一刻，同朋友分享。
然後睇住日出，慢慢地、靜靜地步行返屋企，沖涼和誦經。
咁就啱啱好《起床後的黃金1小時》。
冬季日出大約係6:30am,
廬主可以係7am慢慢享用埋早餐及閱讀，8am先出門口返工。
夏季日出大約係5:30am,
早餐6:30am食完，仲有1.5鐘嘅Me Time，歎咖啡、閱讀、創作、計劃等等。
3. 超高效輸出 (結果)
由起床到出門口返公司，大約有2至3小時嘅Me Time。
每次完成專屬嘅晨間儀式：晨跑、行禪、沖涼、誦經、早餐、咖啡、閱讀，
都感覺非常充實、滿足同開心。
坦白咁講，唔係每日都咁美好，廬主可以日出前半個鐘就起到身。
的確有啲限制性因素，令到晨間計劃無法完全執行。
- 前一晚可能要上堂或者同朋友食飯，比平時遲咗上床瞓覺
- 就算平時9:30-10pm瞓著咗，有時深夜被家人或鄰居嘈醒，都會影響到竪日睡眠質素
- 如果第二朝落雨、勁凍、空氣指數差，廬主都唔會出去晨跑
如果真係出現以上情況，無法早睡早起或者根本瞓得唔好，
廬主心態上又無太過介意，而係「今日唔得，明日繼續」咁諗。
係無乜自我責備嘅情況下，由6/2021至11/2021， 雖然斷斷續續，
但的確培養出及維持咗5個月晨間習慣，享受Me Time，成為Better Me。
另外，只要瞓覺之前，準備咗以下3樣事項，晨間儀式會變得更容易展開。
- 預先寫低，你明日理想生活嘅行程
- 準備埋，你明日可能要用到嘅野，包括運動衣物、早餐等等
- 臨睡前一個鐘，關電腦及設手機為飛行模式，準備好上床瞓覺
如果你都想身體健康啲(身)、心情靚啲(受)、思維清晰啲(心)、想法正面啲(法)，
可以真係俾個機會自己，試一試晨型人嘅生活。
Enjoy Me Time, Be Better ME